რა ხდება: 19 იანვარს ბრიანსკის ოლქში ნავთობბაზაზე ხანძარი გაჩნდა.

  • რუსეთის სახელმწიფო დაქვემდებარებაში არსებული გამოცემა TASS-ი იუწყება, რომ რუსეთის თავდაცვის სამინისტრომ ჩაახშო უკრაინის შეიარაღებული ძალების უპილოტო საფრენი აპარატი ბრიანსკის ოლქში.
  • როდესაც საჰაერო სამიზნე განადგურდა, საბრძოლო მასალა კლინცოვის ნავთობბაზის ტერიტორიაზე მოხვდა.
  • "განადგურების დროს, ჭურვი მოხვდა ნავთობის საცავს და ხანძარი გაჩნდა", — წერს კრემლის პროპაგანდისტული TASS-ი, რეგიონის გუბერნატორზე დაყრდნობით.

დეტალები: ბრიანსკის ოლქის გუბერნატორი, ალექსანდრე ბოგომაზი, თავის ტელეგრამის არხზე ამბობს, რომ უკრაინას კლინცის ტერიტორიაზე მდებარე ობიექტებზე თავდასხმის მცდელობა ჰქონდა.

  • ბოგომაზის თქმით, წინასწარი ინფორმაციით, მსხვერპლი არ არის.
  • ის, ასევე, აცხადებს, რომ "თავდასხმის შედეგების ლიკვიდაციის პროცესში 13 ერთეული სახანძრო მანქანა იყო ჩართული".
  • ამავე პროცესისთვის, მათ სახანძრო მატარებლის დახმარებით, ადგილზე 120 ტონა წყალი და 5 ტონა ქაფის მიტანა დასჭრდათ.

"მანამდე, თავდაცვის სამინისტრომ გაავრცელა ინფორმაცია მოსკოვის დროით დაახლოებით, 06:40 საათზე, რეგიონში უკრაინული საფრენი აპარატის განადგურების შესახებ", — წერს ტასი.

რა ვიცით ამ ნავთობის ბაზის თაობაზე: კლინცოვის ნავთობის საბადო ეკუთვნის Bryansknefteprodukt-ს, რომელსაც როსნეფტი აკონტროლებს.

  • როსნეფტი არის რუსეთის სახელმწიფოს კუთვნილებაში არსებული ნავთობპროდუქტების გიგანტი კომპანია.
  • კონკრეტულად, ის ნავთობბაზა, სადაც აფეთქება მოხდა, ქალაქ კლინცში მდებარეობს, რომელიც უკრაინის საზღვრიდან 50 კილომეტრშია.
  • ეს არის როსნეფტის ერთ-ერთი ნავთობსაცავი რეგიონში.
  • მეორე — ბრაიანსკის ფოკინსკის რაიონში მდებარეობს.
  • კლინცოვის ნავთობის საცავზე დრონებით თავდასხმა მოხდა ასევე, გასული, 2023 წლის მაისში.

ბოლო ხაზი: უკრაინულ მხარეს ამ დრომდე ოფიციალურად არ დაუდასტურებია, რომ უპილოტო საფრენი აპარატი მათ ეკუთვნოდათ.