ახალ საშინელებათა ფილმში მთავარი გმირი მიკი მაუსის ფორმაში გადაცმული მკვლელია. ფილმის ტრეილერი პირველ იანვარს გამოვიდა. ამავე დღეს მიკი მაუსის მონაწილეობით საშინელებათა ჟანრის თამაშიც გამოვიდა.

ეს თარიღი შემთხვევითი სულაც არაა. ამ დღეს მიკი მაუსის პირველ ანიმაციურ ფილმზე დისნეის საავტორო უფლებებს ვადა გაუვიდა და მიკი მაუსის ეს ვერსია საზოგადოებრივი საკუთრება გახდა.

მიკი მაუსის პირველი მოკლემეტრაჟიანი ფილმი 1928 წლის 25 დეკემბერს გამოვიდა. კანონის მიხედვით, კომპანიას ანიმაციურ გმირზე საავტორო უფლებები მხოლოდ 95 წლის განმავლობაში შეიძლება ჰქონდეს. შესაბამისად, ახლა ნებისმიერ ადამიანს შეუძლია, მიკი მაუსის პერსონაჟის თავისებური ინტერპრეტაცია ან ადაპტაცია შექმნას.

დისნეი ანიმაციურ გმირებზე უფლებების შესანარჩუნებლად კვლავაც აქტიურად იბრძვის და მიკი მაუსს, როგორც კომპანიის ერთ-ერთ მთავარ სიმბოლოს, ისევ აქტიურად იყენებს.

მიკი მაუსის ხაფანგის პროდიუსერი, საიმონ ფილიპსი ამბობს, რომ მიკი მაუსისგან სრულიად განსხვავებული პერსონაჟი შექმნეს.

ფილმის ტრეილერში ჩანს, რომ გასართობ პარკში მეგობრები დაბადების დღის წვეულებას მართავენ, თუმცა სიტუაცია მალევე სახიფათო გახდება, როდესაც ისინი მიკი მაუსის კოსტიუმში გამოწყობილ მკვლელს გადააწყდებიან.

"ადგილი გართობისთვის, ადგილი მეგობრებისთვის, ადგილი ნადირობისთვის. თაგვი გარეთ არის", — ვკითხულობთ წარწერას ტრეილერში.

ფილმის გამოსვლის თარიღი ჯერჯერობით უცნობია, თუმცა სავარაუდოდ, მისი პრემიერა მარტში შედგება.

მიკი მაუსი პირველი ანიმაციური გმირი არაა, რომელიც საშინელებათა ფილმის პერსონაჟად იქცა. ბავშვების საყვარელ ვინი პუჰს იგივე ბედი წინა წელს ეწია. ფილმი ვინი პუჰი: სისხლი და თაფლი წლის ყველაზე ცუდ ფილმებს შორის მოხვდა.