აზერბაიჯანის პოლიციამ დააკავა Kanal 11-ის დამფუძნებელი და დირექტორი, ეს უკვე მესამე დამოუკიდებელი მედიასაშუალებაა, რომელიც გასულ თვეში სამართალდამცველების სამიზნე გახდა.

თეიმურ კარიმოვს, გამოძალვის ბრალდებით, ოთხთვიანი წინასწარი პატიმრობა შეეფარდა.

შინაგან საქმეთა სამინისტრომ განაცხადა, რომ კარიმოვი, ონლაინ ტელეკომპანია Kanal 11-ის დამფუძნებელი და დირექტორი, ორშაბათს დააკავეს.

შინაგან საქმეთა სამინისტროს პრესსპიკერმა, იბრაჰიმ ამირასლანლიმ განაცხადა, რომ სამინისტრო კარიმოვს ბრალს უყენებდა "რამდენიმე მოქალაქისგან მიღებული საჩივრების საფუძველზე".

გამოძალვის ბრალდება ითვალისწინებს მაქსიმუმ ხუთ წლამდე თავისუფლების აღკვეთას, ან — თხუთმეტ წლამდე, თუ მას დამამძიმებელ გარემოებები ახლავს, როგორიცაა ორგანიზებული ჯგუფის წევრობა.

კარიმოვის ადგილსამყოფელი, ორშაბათს დილიდან, სამინისტროს განცხადებამდე, უცნობი იყო.

მისმა არხმა გაავრცელა ინფორმაცია, რომ კარიმოვი დააკავეს მის მიერ დასავლეთ დაშკასანის რაიონში კორუფციული ფაქტებისა და ხელისუფლების მხრიდან სამხედრო ვეტერანების მიმართ მოპყრობის გაშუქების გამო.

ის მეექვსე ჟურნალისტია, რომელიც აზერბაიჯანში ბოლო 1 თვის განმავლობაში დააკავეს, მანამდე იყო რეიდი "აბზასმედიაში", მათი მენეჯმენტისა და ჟურნალისტების დაკავება და ასევე, "კანალ 13-ის" დამფუძნებლის და წამყვანის დაჭერა. ეს დაკავებები ვადამდელ საპრეზიდენტო არჩევნებამდე 1 თვით ადრე ხდება — არჩევნები თებერვალში გაიმართება.

"კანალ 11-მა" პირობა დადო, რომ კარიმოვის დაკავების მიუხედავად, გააგრძელებს მაუწყებლობას. მათივე თქმით, კომპანიის დირექტორი "წინასაარჩევნო რეპრესიების მექანიზმის“ ბოლო მსხვერპლი იყო.

"სანამ ქვეყანაში უსამართლობაა, ყოველთვის იქნება ხალხი, რომელიც ამის შესახებ ილაპარაკებს," — აცხადებენ "კანალ 11-ში".

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.