ცოტა ხნის წინ CNN-ზე სტატია გამოქვეყნდა, სახელად "ევროპული ქალაქები, რომლებიც საშობაოდ ჯადოსნურია". სტატიაში სულ 12 ქალაქია მოხსენიებული და სიაში ვენასთან, ჰალშტატთან, ბრიუგესთან და სხვა ქალაქებთან ერთად თბილისიც მოხვდა.

სტატიაში აღნიშნულია, რომ საქართველოში მოსახლეობის უმრავლესობა შობას 25 დეკემბრის ნაცვლად 7 იანვარს აღნიშნავს. ასევე ისიც, რომ ყველაზე მეტს საქართველოში 31 დეკემბერს ზეიმობენ.

"მათთვის, ვინც შობას ვერ ელევა, საქართველო და განსაკუთრებით მისი დედაქალაქი თბილისი პირველი სადღესასწაულო ადგილი უნდა იყოს...მართალია, დღესასწაულები ახალ წელსაც გრძელდება, თუმცა ყველაზე მეტს 31 დეკემბერს ზეიმობენ, როცა ადგილობრივები ერთმანეთს საჩუქრებს ჩუქნიან და გიჟური და იმპროვიზებული ფეიერვერკები ქალაქს ანათებს.

რუსთაველის გამზირზე, პარლამენტის შენობის წინ აღმართული დიდი ნაძვის ხე და ახლომდებარე საშობაო სოფლები და მარკეტები თბილისის სხვა სადღესასწაულო სანახაობებს შორისაა", — ვკითხულობთ სტატიაში.

ნოემბერში კალაძემ განაცხადა, რომ საახალწლოდ ახალი ნაძვის ხის ყიდვა "მოგვიწევდა". ახალი ნაძვის ხის ფასი 780 000 ლარია. ტენდერი ღამის შოუ სტუდიამ აუქციონის გარეშე მოიგო.

"მოგვიწია ახლის ყიდვა", — თქვა თბილისის მერმა, კახა კალაძემ დედაქალაქის მთავრობის სხდომაზე თბილისის საახალწლო ნაძვის ხის შესახებ, — "ვინაიდან გასულ წელს ფეიერვერკის გასროლის შედეგად ცეცხლი გაუჩნდა და დაზიანდა".