უკვე მე-8 წელია, ჯამალ ჰილტონი და ვანდა დენჩი მადლიერების დღეს ერთად აღნიშნავენ, რაც მათთვის ტრადიციად იქცა. გაგიკვირდებათ, თუმცა ამის მიზეზი ის უცნაური შეცდომაა, რომელიც ვანდამ 8 წლის წინ დაუშვა.

2016 წელს ვანდამ ჯამალს შეცდომით ის შეტყობინება გაუგზავნა, რომელიც თავისი შვილიშვილისთვის იყო განკუთვნილი და მადლიერების დღეზე მიიწვია. როგორც აღმოჩნდა, ვანდას შვილიშვილს ტელეფონის ნომერი შეცვლილი ჰქონდა და შეტყობინება ჯამალს მიუვიდა.

ფოტო: Instagram

ვანდამ და ჯამალმა სელფები გაცვალეს და შეცდომაც მალევე აღმოაჩინეს. თუმცა ამის შემდეგ ჯამალმა იკითხა, ისევ შეეძლო თუ არა სადილად მისვლა. "რა თქმა უნდა, შეგიძლია. ბებიები სწორედაც რომ ყველას გემრიელ ვახშამზე ზრუნავენ", — ასეთი იყო ვანდას პასუხი. სწორედ ამ შეტყობინებით დაიწყო მეგობრობა, რომელიც უკვე მე-8 წელია გრძელდება.

მადლიერების დღე ვანდამ და ჯამალმა წელსაც ერთად აღნიშნეს, თუმცა ამჯერად მათთან ერთად კიდევ ერთ სტუმარი იყო. Airbnb-ზე მადლიერების დღისთვის ვანდას სახლის დაჯავშნა შესაძლებელია. Airbnb-ზე ვანდას სახლი არსენმა დაჯავშნა და დღესასწაულის მასთან გატარება გადაწყვიტა, მოგვიანებით კი ვანდასთან და ჯამალთან ერთად სელფიც გადაიღო.

"ჩვენი მე-8 მადლიერების დღის სელფი. დიდი მადლობა არსენს მსოფლიო საუკეთესო დღესასწაულის ჩვენთან ერთად გატარებისთვის", — წერს ვანდა ტვიტერზე და ახალ სელფსაც აქვეყნებს.

ფოტო: Twitter

"ამ ქალბატონის გაცნობა იმის შეხსენება იყო, რომ სამყაროში კარგი ადამიანები ისევ დარჩნენ. ის ძალიან მზრუნველი ადამიანია და ადრე მითხრა, რომ მისი ვეტერანი ქმრის მეგობრებს სადილზე ხშირად იწვევდა და ბევრი ხალხის გვერდით ყოფნას მიჩვეულია. სტუმრობისას კი ისეთი შეგრძნება მაქვს, რომ თითქოს სახლში ვარ", — ამბობს ჯამალი თავისი უფროსი მეგობრის შესახებ People-თან ინტერვიუში.

ვანდასა და ჯამალის მეგობრობა არც ინტერნეტისთვის დარჩენილა შეუმჩნეველი. შეცდომის წყალობით დამეგობრებული ადამიანების ისტორია თავიდანვე ვირუსულად გავრცელდა და პოპულარობას დღემდე ინარჩუნებს. ჯამალის თქმით, ის და ვანდა Netflix-თან ერთად იმ ფილმზე მუშაობენ, რომელსაც მათი მეგობრობის შესახებ იღებენ.