საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი, სოზარ სუბარი ამბობს, რომ მუსტაფა ემრე ჩაბუქი თურქეთში ექსტრადირების შემთხვევაში ევროპული დონის ციხეში მოხვდება და წამებას არ დაექვემდებარება. ამის შესახებ მინისტრმა იმედის ეთერში ისაუბრა და აღნიშნა, რომ საქართველოს ამ მხრივ დიპლომატიური გარანტიები აქვს.

მინისტრის თქმით, ამავე დიპლომატიური გარანტიებით, საქართველოს საკონსულოს წარმომადგენლებს ნებისმიერ დროს ექნებათ საშუალება ჩაბუქის მონახულების და მისი მდგომარეობის შემოწმების.

7 ივნისს ცნობილი გახდა, რომ საქართველომ მუსტაფა ემრე ჩაბუქს ლტოლვილის სტატუსი არ მიანიჭა. სამინისტრო განმარტა, რომ თურქეთის ციხეებში შეინიშნება ადამიანის უფლებათა მდგომარეობის გაუმჯობესება. სამინისტროსვე განცხადებით, თურქეთის ციხეში გადაყვანის შემთხვევაში, ჩაბუქს წამება და არაადამიანური მოპყრობა არ ემუქრება.

მუსტაფა ემრე ჩაბუქი თურქეთის მხარის მოთხოვნით საქართველოში 24 მაისს დააკავეს. მას თბილისის საქალაქო სასამართლომ წინასაექსტრადიციო სამთვიანი პატიმრობა შეუფარდა. ხელისუფლებას ჩაბუქის გათავისუფლებისკენ და თურქეთისთვის არგადაცემისკენ მოუწოდა რვა არასამთავრობო ორგანიზაციამ.