სიტკომ Friends-ის მსახიობი და ჩენდლერის როლის შემსრულებელი მეთიუ პერი 28 ოქტომბერს 54 წლის ასაკში გარდაიცვალა. მიუხედავად იმისა, რომ პერის კარიერის განმავლობაში უამრავი როლი შეუსრულებია, მან ჩენდლერ ბინგის სახით ყველასთვის საყვარელი, დაუვიწყარი პერსონაჟის სახე შექმნა. ამ სტატიაში Friends-დან ჩენდლერის ყველაზე სასაცილო მომენტებს გავიხსენებთ.

1. როცა მან მონიკას, რეიჩელსა და ფიბის ერთმანეთის მიყოლებით აკოცა

ალბათ, ყველას გვემახსოვრება, როგორ უმალავდნენ ჩენდლერი და მონიკა მეგობრებს თავიანთ ურთიერთობას. სწორედ ამ პერიოდში ჩენდლერი დამშვიდობებისას მონიკას ინსტიქტურად კოცნის, შემდეგ კი სიტუაციიდან თავის დასაძვრენად რეიჩელსა და ფიბისაც მსგავსად ემშვიდობება.

2. როცა ფიბიმ ჩენდლერის ცდუნება სცადა

მაყურებლების ერთ-ერთი საყვარელი ეპიზოდი ცნობილი ფრაზითაც გაგვახსენდება — They Don't Know That We Know They Know We Know. როცა რეიჩელი და ფიბი შემთხვევით მონიკასა და ჩენდლერის ურთიერთობის შესახებ გაიგებენ, იმისთვის, რომ წყვილი სიმართლეში გამოტეხონ, ფიბი ჩენდლერის ცდუნებას ცდილობს და ეუბნება, რომ მოსწონს. ბინგიც იმის დასამტკიცებლად, რომ მონიკას მიმართ გრძნობები არ აქვს, იტყუება და იმავეთი პასუხობს. სერია საბოლოოდ იმით მთავრდება, რომ ჩენდლერი მონიკას სიყვარულში გამოუტყდება.

3. როცა ჩენდლერი ვერ იხსენებს ჯოუის შვიდი დიდან რომელს აკოცა

ჯენისთან დაშორების გამო გულნატკენი ჩენდლერი ჯოუის დაბადების დღეზე მისი შვიდი დიდად ერთ-ერთს აკოცებს, შემდეგ დღეს კი ამაოდ ცდილობს, გაიხსენოს, რომელი მათგანია მერი-ანჯელა. ვერ გავამტყუნებთ — მსგავსი გარეგნობისა და ჩაცმულობის მქონე დების ერთმანეთისგან გარჩევა მართლაც ძნელია.

4. როცა ჩენდლერი ჯენისის თავიდან მოსაშორებლად იემენში გაფრინდა

მიუხედავად იმისა, რომ ჯენისის პერსონაჟი 10-სეზონიან სერიალის სულ 19 ეპიზოდში გამოჩნდა, ის ერთ-ერთი პირველია, ვინც შოუზე გვახსენდება. ჩენდლერი ცხოვრების სხვადასხვა ეტაპზე ჯენისს შემთხვევით აწყდება და მის მოშორებას ამაოდ ცდილობს. ამჯერად ბინგი მას არწმუნებს, რომ საცხოვრებლად იემენში გადადის, რის გამოც საბოლოოდ 2100$-იანი თვითმფრინავის ბილეთის ყიდვა და ქვეყნის დატოვება მართლაც უწევს.

5. როცა ის ოფისში ხელბორკილებით მიაბეს

როგორც ხედავთ, ჩენდლერს მონიკამდე სასიყვარულო ურთიერთობებში არ უმართლებდა და როცა რეიჩელის ბოსთან, ჯოანასთან, რომანს გააბამს, ის ჩენდლერს ბორკილებს დაადებს და კარადაზე მიაბამს, თვითონ კი შეხვედრაზე წავა. ბორკილებდადებულ ჩენდლერს შემდეგ რეიჩელი და მისი თანამშრომელი წააწყდებიან.

6. როცა ჩენდლერი ჯოუისთან შესარიგებლად 6 საათი ყუთში იჯდა

მადლიერების დღის ეპიზოდები Friends-ში ყოველთვის გამორჩეული იყო, ამჯერად კი მეოთხე სეზონი უნდა გავიხსენოთ, როცა ჩენდლერს ჯოუის ყოფილი შეყვარებული, ქეითი, შეუყვარდა და მასთან ურთიერთობა დაიწყო, შემდეგ კი, იმისთვის, რომ მეგობრის პატიება დაემსახურებინა, მადლიერების დღეზე 6 საათი ყუთში გაატარა.

7. როცა მან აბაზანის მისაღებად მონიკას თავის მოვლის საშუალებები მოპარა

ურთიერთობის დაწყების მერე მონიკამ ჩენდლერს თავის მოვლის საშუალებები გააცნო, მათ შორის, აბაზანები, რასაც ჩენდლერი მარტივად შეიყვარებს და მონიკას თავის მოვლის საშუალებებს მოპარავს კიდეც, რომ აბაზანის მიღებისას გამოიყენოს. სწორედ ამ დროს მეგობრები მას თავზე წაადგებიან.

8. როცა ჩენდლერი ვიქტორია სიკრეტის მოდელთან ერთად ოთახში გაიჭედა

პირველი სეზონის დასამახსოვრებელი მომენტებიდან ერთ-ერთი ნამდვილად ისაა, როცა ჩინდლერი მოდელ ჯილ გუდაკრთან ერთად ბანკომატის ვესტიბიულში გაიჭედება. დაბნეულმა ჩენდლერმა არ იცის, როგორ მოიქცეს და რჩევის საკითხავად ჯოუის დაურეკავს. ბოლოს, როცა ჯილი მას საღეჭ რეზინს შესთავაზებს, ღეჭვისას ჩენდლერი ლამის დაიხრჩობა და მოდელის წინაშე თავს შეირცხვენს.

9. როცა სიგარეტისთვის თავის დასანებებლად ჰიპნოზი ჩაიტარა

რთულია, ჩენდლერის სიგარეტზე დამოკიდებულება დაგავიწყდეს. მან მოწევისთვის თავის დანებება რამდენჯერმე სცადა და მეგობრებს ატყუებდა კიდეც, რომ არ ეწეოდა. საბოლოოდ, ჩენდლერი სიგარეტისთვის თავის დასანებებლად შემთხვევით ქალი მწეველებისთვის განკუთვნილ ჰიპნოზის ჩანაწერს იყიდის, რომელიც წარმატებულად დაარწმუნებს, რომ "ძლიერი, თავდაჯერებული ქალია" და მოწევა არ სჭირდება.

10. როცა მთელი დღე ლურჯი ტუჩსაცხით დადიოდა

ჩენდლერი ამჯერადაც შარში გაეხვა — მან ჯოუის უთხრა, რომ იაპონური კოსმეტიკის რეკლამას, რომელშიც ტრიბიანი მონაწილეობას იღებდა, უყურა, თუმცა ეს ტყუილი აღმოჩნდა. ჯოუისთან შესარიგებლად ჩენდლერი მთელი დღე ლურჯი ტუჩსაცხით დადიოდა და ამბობდა, რომ "პატარა, ლამაზი გოგოა".

იხილეთ ასევე:

• მეთიუ პერის ფანებმა იმ ბინასთან, რომელშიც ჩენდლერი ცხოვრობდა, ყვავილები მიიტანეს
• საყვარელი შვილისა და ძმის ტრაგიკული სიკვდილით გულგატეხილები ვართ — მეთიუ პერის ოჯახი
• მეთიუ პერის ცხოვრება ფოტოებში