2019 წლის ნოემბერში, 11 000-ზე მეტმა ექსპერტმა მთელი მსოფლიოდან ხელი მოაწერა დეკლარაციას, რომელიც კლიმატთან დაკავშირებით საგანგებო სიტუაციას უსვამდა ხაზს. განცხადებაში მეცნიერები საზოგადოებებსა და ხელისუფლებებს შესაბამისი ზომების მიღებისკენ მოუწოდებდნენ.

და აი ახლა, 15 000-ზე მეტმა მეცნიერმა განცხადება განაახლა. მათი თქმით, დედამიწაზე სიცოცხლეს საფრთხე ემუქრება.

იმოქმედეთ

"თუ არ ვიმოქმედებთ ეს ყველაფერი კოლაფსამდე მიგვიყვანს. გაუსაძლისი სიცხეები გააჩენს საკვებისა და მტკნარი წყლის დეფიციტს", — თქვა ორეგონის სახელმწიფო უნივერსიტეტის კოლეჯის ყოფილმა დოქტორანტმა და მოხსენების წამყვანმა კრისტოფერ ვულფმა.

საუბარია ქმედებებზე, რომელიც უფრო მდგრად და ეკოლოგიურად სუფთა რესურსზე გადასვლას მოიცავს — ეს შეიძლება იყოს განახლებადი ენერგიის წყაროები.

მეცნიერები ამბობენ, რომ ერთ-ერთი მთავარი პრობლემა წიაღისეული საწვავია.

"პლანეტაზე სიცოცხლეს საფრთხე ემუქრება", — აღნიშნულია განცხადებაში.

ცნობისთვის, გლობალური დათბობა დედამიწის ზედაპირის, ატმოსფეროსა და ოკეანის საშუალო წლიური ტემპერატურის ზრდის პროცესია. მასში დედამიწის კლიმატური სისტემის საშუალო ტემპერატურის გრძელვადიანი მატება იგულისხმება.

1880 წლიდან მოყოლებული დედამიწაზე საშუალო ტემპერატურა 1 გრადუსით გაიზარდა. მეტიც, 21-ე საუკუნიდან მოყოლებული საშუალოდ თითქმის ყოველი წელი, წინა წელთან შედარებით უფრო ცხელია.

შემდეგი პოდკასტი: გლობალური დათბობა — როგორ იცვლება კლიმატი

"როგორც მეცნიერებს, ჩვენ ძალიან გვანაღვლებს კლიმატთან დაკავშირებული კატასტროფების სიხშირისა და სიმძაფრის მატება. ეს იმაზე მიუთითებს, რომ 21-ე საუკუნის ბოლოსთვის 3-დან 6 მილიარდამდე ადამიანი საფრთხის წინაშე იქნება. ეს შეიძლება აისახოს საკვებისა და წყლის დეფიციტზე", — აღნიშნულია განცხადებაში.

მოხსენება ჟურნალ BioScience-ზე გამოქვეყნდა.