ქართული რუსულენოვანი ონლაინ გამოცემა Sova.News ფაქტების გადამოწმებაზე დამყარებულ, დამოუკიდებელ პოლონურ მედია გამოცემასთან, OKO.press-თან იწყებს თანამშრომლობას.

პრეზენტაცია დღეს, GeoLab-ში, Sova.News-ის დამფუძნებელმა, მართა არდაშელიამ და OKO.press-ის მთავარმა რედაქტორმა, სტანისლავ სკარჟინსკიმ, გამართეს.

Sova.News ორი წლის წინ თბილისში დაფუძნდა. მისი მიზანია, აუდიტორიას საქართველოს შესახებ რუსულ ენაზე დაბალანსებული ინფორმაცია მიაწოდოს.

"ჩვენ ვართ რუსულენოვანი დამოუკიდებელი ქართული მედია საშუალება, რომლის მიზანია საქართველოში მიმდინარე მოვლენები, ჩვენი საგარეო პოლიტიკა, რუსულ ენაზე იყოს ხელმისაწვდომი აუდიტორიისთვის. ეს ინფორმაცია თავისუფალია სხვადასხვა პოლიტიკური გავლენებისგან. როგორც ვიცით, თითქმის ყველაფერი, რაც რუსულ ენაზე იწერება საქართველოს შესახებ, ძირითადად, რუსული რბილი ძალის გავლენის ქვეშ არის და კონკრეტულ პოლიტიკურ მიზნებს ემსახურება" - ამბობს მართა On.ge-სთან საუბრისას.

Sova.News მასალებს სხვადასხვა დიდი მედიაგამოცემები უკვე იყენებენ მთავარ წყაროდ. მათ შორის ოპოზიციური რუსული ტელეკომპანია დოჟდი.

სტანისლავ სკარჟინსკი და მართა არდაშელია

ფოტო: Sova.News

სოვა ნიუსისა და ოკო პრესის თანამშრომლობის ფარგლებში, რუსულ, პოლონურ და ინგლისურ ენაზე დაიწერება მასალები საქართველოში რუსული რბილი ძალის გავლენის შესახებ.

"დღეს უკვე ვიწყებთ თანამშრომლობას ოკო პრესთან. პროექტს ამერიკის სახელმწიფო დეპარტამენტი, პროგრამა Digital Communication Network-ის ფარგლებში, აფინანსებს. ჩვენ შევისწავლით მათი ფაქტ-ჩექინგის. ჩვენს საიტზე დაიდება ეს რუსულად, ხოლო ოკო პრესზე ინგლისურად და პოლონურად" - გვითხრა მართა არდაშელიამ.

OKO.press ერთი წლისაა და პოლონეთში ინფორმაციის გადამოწმების ყველაზე მასშტაბურ საიტს წარმოადგენს.

"ჩვენ გადავწყვიტეთ გავუზიაროთ Sova.News-ს, როგორ ვამოწმებთ ინფორმაციას OKO.press-ში და როგორ ამოვიცნობთ ყალბ ცნობებს, რომლებსაც პოლიტიკოსები ან ცნობილი ფიგურები ავრცელებენ, როგორ ვებრძვით სხვადასხვა გზით გავრცელებულ პროპაგანდას. ჩვენ ასევე გვაქვს ტექნოლოგიური, ინფორმატიკული კოდი, რომელსაც მივაწოდებთ სოვანიუსს" - ამბობს სტანისლავი On.ge-სთან საუბრისას.

სკარჟინსკის თქმით, გამოცემები თავიანთ პლატფორმებზე სხვადასხვა მასალებსაც გაცვლიან.

"ამ გზით, შესაძლოა, [პროპაგანდის] საერთო ნიშნები აღმოვაჩინოთ".