Jimin’s Production Diary ახალი დოკუმენტური ფილმის სახელია, რომელსაც BTS-ის წევრი Jimin თვის ბოლოს გამოუშვებს. J-hope-სა და Suga-ს შემდეგ ეს უკვე ჯგუფის მესამე წევრის დოკუმენტური ფილმი იქნება, რომელსაც მაყურებელი იხილავს.

Jimin’s Production Diary იმ პერიოდის შესახებ მოგვითხრობს, როცა Jimin-მა სოლო სადებიუტო ალბომი, სახელად FACE, გამოუშვა. ალბომი მარტში გამოვიდა, ფილმში კი მაყურებელი ნახავს, თუ როგორ მიმდინარეობდა FACE-ზე მუშაობის პროცესი.

"მაყურებელი Jimin-ის პიროვნებას უფრო ახლოდან გაიცნობს, რადგან ფილმი მომღერლის იმ გულწრფელი ემოციებისა და აზრების შესახებ გვიყვება, რომლებიც მას ალბომზე მუშაობის პერიოდში ჰქონდა", — ნათქვამია დოკუმენტური ფილმის აღწერაში.

ცოტა ხნის წინ Jimin-ის შესახებ დოკუმენტური ფილმის ტრეილერი გამოვიდა. ვიდეოში ვხედავთ, რომ Jimin სტუდიაში თავის ალბომზე მუშაობს. "ამან შესაძლებლობა მომცა, რომ უფრო ნათლად გამეგო, თუ რა უნდა გამეკეთებინა. შემიძლია ვთქვა, რომ კიდევ უფრო ბევრი რამის გაკეთება მინდა", — ამბობს მომღერალი.

Jimin’s Production Diary-ის პრემიერა 23 ოქტომბერს შედგება. მანამდე კი, 14 ოქტომბერს, ფილმის კიდევ ერთი ტრეილერი გამოვა.