მამუკა ფიფია რუსეთში მოღვაწე ბიზნესმენია, რომელიც პროკრემლისტურ შეხედულებებს აფიქსირებს.

  • ინსტაგრამზე ის აქვეყნებს ფოტოებს კომუნისტ დეპუტატ სერგეი გავრილოვთან ერთად.
  • ასევე, მონაწილეობდა ქართულ-რუსული დელეგაციის შეხვედრებში და ამტკიცებდა, რომ პირდაპირი ავიარესები და უვიზო მიმოსვლა რუსეთთან მათი მუშაობის შედეგია.

ფოტო: კადრები ფიფიას ინსტაგრამიდან

პარლამენტში გადაღებული ფოტოები ფიფიამ ინსტაგრამზე გუშინ გამოაქვეყნა.

  • ერთ-ერთ ფოტოს მიხედვით, ის სხდომათა დარბაზშია და მმართველი გუნდის დეპუტატებისთვის განკუთვნილ სკამიდან იღებს.
  • მეორე ფოტო კი პარლამენტის ერთ-ერთ კაბინეტში აქვს გადაღებული და თან ახლავს წარწერა: "ვეცნობი საქართველოს კონსტიტუციას".
  • ამის გასაპროტესტებლად მოქალაქეები პარლამენტთან შეიკრიბნენ.
  • ქართული ოცნების ლიდერმა, მამუკა მდინარაძემ ჟურნალისტებთან განაცხადა, რომ ფიფია დარბაზში არ იმყოფებოდა და მომხდარი ასე განმარტა:
  • "გუშინ ეს ადამიანი მთელი დღის განმავლობაში, დილიდან ურეკავდა ვასიკო ჩიგოგიძეს და უნდოდა მასთან შეხვედრა. მის ნაცნობ ვასიკო ჩიგოგიძეს. ვასიკო ჩიგოგიძემ დაუშვა საშვი. სხდომაზე რადგან იყო სხვადასხვა საკითხი, მე პირადად ვწერდი დეპუტატებს, რომ ყველანი სხდომაზე ვიყოთ, კენჭისყრების დრო იყო და ასე შემდეგ. მან უთხრა, რომ დალოდებოდა მის ოთახში, მის კაბინეტში. მაშინ აქვს, როგორც ჩანს, ეს ფოტო გადაღებული".
  • ამავდროულად, მდინარაძემ განავითარა მოსაზრება, რომ ეს მიზანმიმართული დადგმული პროვოკაციაა, რადგან მედიამ დღეს მიაგნო ამ ამბავს.
  • "გავრილოვის მეგობარია თუ ბიძაშვილი საერთოდ არ ვიცი, რუსეთში არის ის ადამიანი. პირდაპირ გეუბნებით, რომ თვითონ ვასიკოც ძალიან გაბრაზებულია, როგორც ამას ჩვენთან აფიქსირებს. ადამიანი შემოვიდა შეხვედრაზე პარლამენტში და ტვირთავს ქართული გერბით დეპუტატის პარლამენტიდან ფოტოებს და ეს შემთხვევითი ამბავი არ არის", — განაცხადა მდინარაძემ.