ლონდონის ერთ-ერთ პარკში იშვიათის ჯიშის ორი წითელი პანდა დაიბადა. ტყუპი პანდები გადაშენების პირას მყოფი სახეობების გამრავლების საერთაშორისო პროგრამის ხელშეწყობით გაჩნდნენ. ორივე პანდა ჯანმრთელია და დედასთან ერთად თავს უსაფრთხოდ გრძნობენ.

"როცა ტყუპი პანდები გაიზრდებიან, გადაშენების პირას მყოფი სახეობების გამრავლების პროგრამას შეუერთდებიან და მათი სახეობის გადარჩენას შეეცდებიან. ახლა ისინი ძალიან პატარები არიან, დიდ დროს დედასთან ატარებენ, რომელიც მათ კვებავს და მათზე ზრუნავს", — ამბობს პარკის თანამშრომელი.

ფოტო: Tom Andres

ტყუპი პანდები ივნისში დაიბადნენ, თუმცა ლონდონის პარკმა მათ შესახებ დეტალები ახლახან გაავრცელა. გამომდინარე იქიდან, რომ ტყუპი წითელი პანდების ჯიში გადაშენების საფრთხის ქვეშაა, ისინი მკვლევრების მეთვალყურეობის ქვეშ არიან. გაზრდასთან ერთად კი, წითელი პანდები გარე სამყაროსთან ადაპტაციას მშობლებთან და ექსპერტებთან ერთად შეძლებენ.

ცნობისთვის, წითელი პანდა გადაშენების პირას მყოფ სახეობადაა მიჩნეული. ექსპერტების ვარაუდით, ტყეების გაჩეხის, ბრაკონიერობისა და ცხოველებით უკანონო ვაჭრობის გამო, წითელ პანდებს სამომავლოდ გაქრობა ემუქრებათ, სხვადასხვა პროგრამა კი სწორედ მათ გადარჩენაზე ზრუნავს.