ბოლო დღეებში თბილისში ჰაერის ტემპერატურამ თითქმის 40 გრადუსს მიაღწია, თუმცა, დედაქალაქში მოძრავ სამგზავრო მიკროავტობუსების ნაწილში მძღოლები კონდიციონერს არ რთავენ. არის შემთხვევები, როცა ისინი კონდიციონერის ნაცვლად უბრალოდ ვენტილაციას ამუშავებენ, რის გამოც მიკროავტობუსში, ცივი ჰაერის ნაცვლად, ქუჩის ცხელი ჰაერი უბერავს.

On.ge-მ ასევე მოისმინა მოქალაქეთა პრეტენზიები, რომ მიკროავტობუსის კომპანიის ცხელ ხაზზე, რომლის ნომერია 2 200 340, მათ ზარებს არ პასუხობენ. ჩვენ გადავამოწმეთ აღნიშნული ფაქტი. 15 წუთის განმავლობაში რამდენჯერმე ვცადეთ ცხელ ხაზზე დარეკვა, თუმცა, ხუთწუთიანი ლოდინის შემდეგ ზარი გაითიშა.

თბილისის მიკროავტობუსის პრესასთან ურთიერთობის სამსახურში ამბობენ, რომ კომპანიის ცხელ ხაზზე შვიდი თანამშრომელი მუშაობს და რადგან ზარების რაოდენობა დიდია, მოქალაქეებს ლოდინი უწევთ. კომპანიაში ასევე ამბობენ, რომ მძღოლები პირველი ივლისიდან ვალდებულნი არიან, ჩართონ გაგრილების სისტემა, წინააღმდეგ შემთხვევაში, პირველ ჯერზე გაფრთხილებას მიიღებენ, მეორე ჯერზე - ორი კვირით შეეზღუდებათ მუშაობა, მესამე ჯერზე კი მათ სამსახურიდან დაითხოვენ. კომპანიაში ასევე ამტკიცებენ, რომ თითოეულ მძღოლს, ხაზის დატვირთვიდან გამომდინარე, შეუმცირდა ყოველთვიური გეგმა, გარდა ამისა, კომპანიამ საკუთარი სახსრებით შეაკეთა კონდინციონერები.

თბილისის მიკროავტობუსი მოქალაქეებს საჩივრების დაფიქსირებისკენ მოუწოდებს.