რა მოხდა: 11 აგვისტოს, რუსეთის შორეულ აღმოსავლეთ ამურის რეგიონში მდებარე ვოსტოჩნის კოსმოდრომიდან რუსული უპილოტო კოსმოსური ხომალდი, Luna-25 გაეშვა.

  • თანამედროვე რუსეთის ისტორიაში ეს პირველი მისია იყო მთვარეზე.

  • Luna-25 პირველი ხომალდი უნდა ყოფილიყო, რომელიც მთვარის სამხრეთ პოლუსზე დაეშვებოდა, მთვარის იმ ნაწილს შეისწავლიდა, რომელიც მეცნიერთა აზრით, გაყინულ წყალსა და ძვირფას ელემენტებს იტევს და სხვა სადგურებზე დასაფრენად მოემზადებოდა, თუმცა ამ მისიამ კრახი განიცადა.

  • 20 აგვისტოს ცნობილი გახდა, რომ კოსმოსურმა ხომალდმა კონტროლი დაკარგა და მთვარის ზედაპირს შეეჯახა.

  • რუსეთის სახელმწიფო კოსმოსურმა სააგენტომ განაცხადა, რომ კონტაქტი დაკარგეს.

  • "800 კგ-იანი ხომალდი მთვარის ზედაპირს შეეჯახა და არსებობა შეწყვიტა", – დაწერეს მათ.
  • როსკომოსში ამბობენ, რომ მისიის ჩავარდნის მიზეზებს "სპეციალური კომისია" შეისწავლის.

Luna-25-ის დაკარგვა მთელი ქვეყნისთვის და კონკრეტულად რუსეთის კოსმოსური სააგენტოსთვის დიდი დარტყმაა.

  • მისი პროგრამების დაფინანსება უკვე რამდენიმე წელია იკლებს, რადგან ბიუჯეტის დიდი ნაწილი სამხედრო სისტემისკენაა მიმართული.
  • Luna 24, წინა ხომალდი, ბოლოს მთვარეზე 1976 წლის 18 აგვისტოს დაჯდა.
  • გარდა ამისა, მომხდარი მორიგი მარცხია რუსული პროპაგანდისთვისაც, რადგან აგრესორი ქვეყანა ცდილობდა, ეჩვენებინა, თითქოს ომსა და სანქციებს არ დაუზიანებია და ჯერ კიდევ მოწინავე სახელმწიფოა.
  • თუმცა მოხდა ისე, როგორც, დაახლოებით, მათი საამაყო რუსული გემის, მოსკვას, შემთხვევაში, რომელმაც "დანიშნულების ადგილს" მიაღწია.
  • შეგახსენებთ, რომ სწორედ მოსკვას ეკიპაჟს მიმართა უკრაინელმა სამხედრომ აწ უკვე საკულტო ფრაზით: "რუსულო სამხედრო ხომალდო, იდი ნა*უი".

რუსეთის მარცხს გამოეხმაურა ესტონეთის ყოფილი პრეზიდენტი, ტოომას ჰენდრიკ ილვესი.

  • "ვერ ვხვდები, რატომ წავიდნენ რუსები მთვარეზე. დიახ, მიწა არის, მაგრამ არც სარეცხი მანქანებია და არც უნიტაზები, რომ მოიპარონ. კიდევ ერთხელ მოვიყვანოთ მსოფლიოში ცნობილი ერთადერთი რუსული წინადადება: "ჩვენ მაქსიმალურად ვეცადეთ, მაგრამ ისე გამოვიდა, როგორც ყოველთვის", — დაწერა მან.