რამდენიმე დღის წინ გაუჩინარებული წყალქვეშა ნავი, რომელიც ტიტანიკისკენ მიემგზავრებოდა, კატასტროფას ემსხვერპლა. მოგზაური კრის ბრაუნი ერთ-ერთია, ვინც ამ ხომალდში უნდა მჯდარიყო. მისი თქმით, "ტიტანიკის ტურზე" მასზე ინფორმაციის გაგებისთანავე დარეგისტრირდა, რადგან ჩათვალა, რომ ეს ახალი ექსპედიციისა და აღმოჩენებისთვის კარგი შესაძლებლობა იქნებოდა.

მოგზაურმა ტურის საფასურის ნაწილი თავის მეგობარ ჰემიშ ჰარდინგთან ერთად შეიტანა, რომელიც ახლა გაუჩინარებულ 5 მგზავრს შორის ერთ-ერთია. ჰარდინგი გინესის ოთხგზის რეკორდსმენია, რომელმაც ბოლო რეკორდი 2021 წელს მარიანის ღრმულის ფსკერზე ჩავლისა და იქ დროის გატარებისთვის დაამყარა. ნავის გაუჩინარების შემდეგ, ბრაუნმა მედიებთან ექსპედიციაში მონაწილეობაზე უარის თქმის მიზეზებზე დაიწყო საუბარი. მისი თქმით, რაც უფრო მეტს იგებდა ტურის შესახებ, უფრო და უფრო სახიფათოდ ეჩვენებოდა, რადგან კომპანია უსაფრთხოებასთან დაკავშირებულ რისკებს არასათანადო ყურადღებით ეკიდებოდა.

უარის თქმის მთავარ მიზეზად ბრაუნი წყალქვეშა ნავის გაუმართავ მდგომარეობას ასახელებს. მისი თქმით, როდესაც ხომალდის ნაწილების სანახავად იყვნენ მისულები, მას ადგილზე არაპროფესიონალური სურათი დახვდა. ბრაუნი ამბობს, რომ ნავის ნაწილები უბრალოდ თაროდან შემთხვევითად შერჩეულ ნივთებს ჰგავდა, მაგალითად, იქსბოქსის ჯოისტიკის მსგავსი პულტი, რომელსაც ხომალდის სამართავად იყენებდნენ. ამის შემდეგ, ბრაუნმა გადაწყვიტა ტურზე უარი ეთქვა და გადახდილი თანხა უკან გამოითხოვა.

შეგახსენებთ, რომ კომპანია OceanGate-ის ტურისტული წყალქვეშა ნავი, რომელიც ჩაძირული ტიტანიკისკენ მიემგზავრებოდა, 18 ივნისს გაუჩინარდა. ბორტზე მყოფ 5 ადამიანთან კავშირი წყალში ჩაშვებიდან საათისა და 45 წუთის შემდეგ გაწყდა. აშშ-ის სანაპირო დაცვის სამსახური და კომპანია OceanGate ადასტურებენ, რომ ბორტზე მყოფი ყველა ადამიანი გარდაცვლილია.