პარტიების ფინანსური მონიტორინგის სამსახურის ინფორმაციით, 2017 წლის პირველი ხუთი თვის განმავლობაში, პარტიებს შორის, ყველაზე მეტი თანხა მიიღო ევროპულმა საქართველომ. ამ პარტიისთვის თანხა, სულ, 42-მა პირმა გაიღო, გაღებული თანხის ოდენობა კი 131 179 ლარია.

2017 წლის პირველი იანვრიდან მაისის ჩათვლით მიღებული თანხის ოდენობით, მეორე ადგილზეა გირჩი. ამ პარტიას შვიდმა პირმა 21 767 ლარი შესწირა.

მოცემულ პერიოდში, 32 პირისგან 16 446 ლარი მიიღო ერთიანმა ნაციონალურმა მოძრაობამ. რაც შეეხება ქართულ ოცნებას, მას, ჯერჯერობით, მხოლოდ რვა პირმა შესწირა 8 750 ლარი.

გამომდინარე იქიდან, რომ 2017 წლის ადგილობრივი თვითმმართველობის არჩევნებისთვის საარჩევნო კამპანია აქტიურად არ არის დაწყებული, მცირეა პარტიების მიერ მიღებული შემოსავლებიც. მაგალითად, მხოლოდ გასულ წელს, როცა საპარლამენტო არჩევნები ტარდებოდა, ქართული ოცნების მიერ მიღებულმა შემოსავალმა 23 მილიონ ლარს მიაღწია.

სხვა პარტიებს, მათ შორის, პატრიოტთა ალიანსს, რესპუბლიკურ პარტიასა და ლეიბორისტებს, მიმდინარე წელს შემოსავლები არ უფიქსირდებათ.