ახალი რეგულაციების შესახებ მთავრობის სხდომაზე ირაკლი ღარიბაშვილმა ისაუბრა.

რატომ არის მნიშვნელოვანი: პრემიერმინისტრმა დააანონსა, რომ ავტომობილებისთვის დაგეგმილია ევრო 5-ის სტანდარტის შემოღება, რაც მსუბუქი ავტომობილებისთვის ძალაში 2024 წლის პირველი იანვრიდან, ხოლო ავტობუსების და სატვირთო ავტომობილებისთვის 2025 წლის პირველი იანვრიდან შევა.

  • "ამაზე ჯერ კიდევ ვმსჯელობთ, არსებობს გარკვეული მოსაზრებები და ამის თაობაზე გვინდოდა, რომ უფრო მეტი გონივრული ვადა მიგვეცა", — თქვა ღარიბაშვილმა.
  • ამბობს, რომ მიღებული გადაწყვეტილება არ შეეხება ქვეყანაში უკვე არსებულ ავტომობილებს, როგორც რეექსპორტისა და ტრანზიტის მიზნებისთვის შემოსულ ავტომანქანებს.

დეტალები: ღარიბაშვილის თქმით, გადაწყვეტილება უკავშირდება ჰაერის დაბინძურების საკითხის, რომელიც ყველას აწუხებს.

  • ამბობს, რომ უკვე დიდი ხანია, რაც დაწესებულია სტანდარტი საწვავზე და საქართველოში ევრო 5-ის სტანდარტის საწვავი შემოდის, რასაც მუდმივად მონიტორინგს უტარებს შესაბამისი სამსახური, გარემოს ეროვნული სააგენტო.
  • მისივე თქმით, შემოდის ასევე ევრო 5-ის სტანდარტის დიზელი და ბენზინიც — ხდება რუტინულად შემოწმება ხარისხის.
  • ამბობს, რომ დღეს ერთ-ერთი მთავარი გამოწვევა ჰაერის დაბინძურებაა, რაც დაკავშირებულია ძალიან ბევრი გაუმართავ ავტომობილთან.
  • "მოგეხსენებათ, რომ ეს პირდაპირ კავშირშია ჰაერის ხარისხის გაუმჯობესებასთან და ვფიქრობთ, ეს ყველაფერი დადებითად აისახება მოსახლეობის ჯანმრთელობის მდგომარეობაზეც", — თქვა პრემიერმინისტრმა.

გარდა ამისა, ირაკლი ღარიბაშვილი ჰაერის ასეთ დაბინძურებას უკავშირებს ავტომობილებს, რომლების ე.წ კატალიზატორის გარეშე ფუნქციონირებენ.

  • "ერთ-ერთი მთავარი პრობლემა არის ის, რომ ეს გაუმართავი ავტომობილები რიგ შემთხვევაში ბიზნესად არის გადაქცეული. ე.წ კატალიზატორების საკითხი და პრობლემა. ჩვენ ამის თაობაზე საკითხი შევისწავლეთ და ვთქვით, რომ აუცილებელია კატალიზატორების ექსპორტის შეჩერება", — განაცხადა პრემიერმინისტრმა.
  • ამბობს, რომ ცალკე დადგენილებას გამოსცემენ და ქვეყნიდან კატალიზატორების გატანა აიკრძალება.
  • მისივე თქმით, ავტომობილებს აცლიან კატალიზატორს და ყიდიან უცხოეთში, რაც მთავარი პრობლემის გამომწვევია.
  • ღარიბაშვილის თქმით, ჰაერის ხარისხი გაუმჯობესდება მას შემდეგ, რაც ამ სტანდარტს შემოიღებენ.
  • "გარემოს ეროვნული სააგენტო დაიწყებს ხარისხის სისტემატურ შემოწმებას, ასევე ავტომობილების. მიმდინარე წლიდან თბილისში, რუსთავში, ბათუმსა და ქუთაისში ხილული, ჭარბი გამონაბოლქვის მქონე სატრანსპორტო საშუალებების გზებზე კონტროლს", — თქვა ღარიბაშვილმა.