მოსამართლის გადაწყვეტილებით, ესპანელი მხატვრის, სალვადორ დალის გვამს ამოთხრიან და ექსჰუმაციას ჩაუტარებენ.

BBC-ის ინფორმაციით, ესპანელი ქალი პილარ აბელი ამბობს, რომ სალვადორ დალი მისი მამაა. მისი თქმით, დალის დედამისთან სასიყვარულო ურთიერთობა 1955 წელს ჰქონდა. ამ დროს სალვადორ დალის უკვე ცოლი ჰყავდა.

გვამის გამოკვლევის მიზანი სწორედ დნმ-ის ანალიზისთვის საჭირო მონაცემების მიღებაა, რათა დადასტურდეს, არის თუ არა სალვადორი ნამდვილად პილარ აბელის მამა.

მოსამართლის თქმით, ექსჰუმაცია იმიტომ გადაწყდა, რომ მხატვრის პირად ნივთებზე არ აღმოჩნდა ტესტის ჩატარებისთვის აუცილებელი ბიოლოგიური მასალა.

სალვადორ დალი 1989 წელს 85 წლის ასაკში გარდაიცვალა.