თბილისი პრაიდის ყოველწლიური კვირეული 1-8 ივლისს ბრუნდება. წელს თბილისი პრაიდის კვირეული მოიცავს პოლიტიკური, კულტურული და აკადემიური ხასიათის დახურულ ღონისძიებებს, მათ შორის საერთაშორისო ლგბტქ კონფერენციასა და პრაიდის ფესტივალს.

"პრაიდის კვირეული ლესბოსელი, გეი, ბისექსუალი, ტრანსგენდერი და ქვიარ ადამიანებისთვის ერთმანეთის დანახვის, გაერთიანების, თავისუფალი თვითგამოხატვისა და საკუთარი უფლებებისთვის ბრძოლის უნიკალური შესაძლებლობაა. პრაიდის კვირეულის ჩატარება კიდევ უფრო მნიშვნელოვანი და პოლიტიკურია საქართველოში, სადაც ქვიარ მოძრაობის გავლენიანი მოწინააღმდეგეები გამიზნულად უშლიან ხელს ადამიანის ფუნდამენტური უფლებების დაცვას, თესავენ სიძულვილს და ავრცელებენ პუტინისტურ იდეოლოგიას", — ვკითხულობთ თბილისი პრაიდის განცხადებაში.

პრაიდის კვირეულის ფარგლებში ორგანიზაციის მიზანია თემის გაძლიერება, საზოგადოების ცნობიერების ამაღლება, ლგბტქ კულტურისა და ისტორიის დამსწრე საზოგადოებისთვის გაცნობა და ლბგტქ საზოგადოების უფლებების დაცვის აქტიურად მოთხოვნა.

შეგახსენებთ, რომ 2021 წელს ჰომოფობიური, ძალადობრივი ჯგუფები და საპატრიარქო მაშინვე დაუპირისპირდნენ თბილისი პრაიდს, როგორც კი ღონისძიებები დაანონსდა და განაცხადეს, რომ მის ჩატარებას არ დაუშვებდნენ.

5 ივლისს ჰომოფობიური ჯგუფები შეიკრიბნენ და ჟურნალისტებს ფიზიკურად გაუსწორდნენ. თავდასხმის შედეგად დაშავდა 50-ზე მეტი ჟურნალისტი. მოძალადეებმა დაარბიეს თბილის პრაიდის ოფისი, სცადეს სირცხვილიას ოფისში შეჭრა და თავს დაესხნენ ადამიანის უფლებათა ცენტრს, სადაც, სავარაუდოდ, ხელნაკეთი ასაფეთქებელი მოწყობილობა შეაგდეს, რის შედეგადაც ერთი ადამიანი დაშავდა. 11 ივლისს აქციაზე ნაცემი ოპერატორი, ლექსო ლაშქარავა გარდაიცვალა.

აღსანიშნავია, რომ 5-6 ივლისის ძალადობას წინ უძღოდა ქართული ოცნების ლიდერების განცხადებები იმაზე, რომ ღირსების მარშს მიზანშეწონილად არ მიიჩნევენ. ჰომოფობიური და ძალადობრივი აქციის ორგანიზატორები ამ დრომდე არ დასჯილან.

ამავე თემაზე: