რატომ არის მნიშვნელოვანი: გუშინ სოციალურ ქსელში გავრცელდა ინფორმაცია, რომ ვაშლოვანის ნაკრძალში სასაზღვრო პოლიციის თანამშრომელმა ტურისტს ხელბორკილი დაადო და იარაღიდან გაისროლა.

  • როგორც თვითმხილველმა ბათუმელებს განუცხადა, მესაზღვრე არაფხიზელ მდგომარეობაში იყო და ტურისტებს დამამცირებლად ექცეოდა.

დეტალები: სპეციალური საგამოძიებო სამსახურის განცხადებით, მესაზღვრე 28 მაისს, ტურისტების ბანაკის მიმდებარედ ქვეითად პატრულირებდა, რა დროსაც მათთან შელაპარაკება მოუვიდა.

  • "მან დიდი ბრიტანეთისა და ბელარუსის მოქალაქე ტურისტებს, თვითნებურად, ყოველგვარი სამართლებრივი საფუძვლის გარეშე ხელბორკილი დაადო და რაიმე წინაპირობის არ არსებობის მიუხედავად, სამსახურებრივი ავტომატური ცეცხლსასროლი იარაღიდან ერთი გასროლა მოახდინა, რის შედეგადაც დაზიანება არავის მიუღია", — აცხადებს უწყება.
  • სასაზღვრო პოლიციის თანამშრომელი დააკავეს.
  • საქმეზე გამოძიება სისხლის სამართლის კოდექსის 333-ე მუხლის მე-3 ნაწილის "ბ "ქვეპუნქტით გრძელდება, რაც სამსახურებრივი უფლებამოსილების ძალადობით ან იარაღის გამოყენებით გადამეტებას გულისხმობს.
  • დანაშაული ხუთიდან რვა წლამდე თავისუფლების აღკვეთას ითვალისწინებს.