Imagine Dragons-მა უკრაინის მხარდასაჭერი სიმღერა, სახელად Crushed, 2022 წელს ჩაწერა. ახლახან კი ჯგუფმა სიმღერის კლიპი გამოუშვა, რომელშიც უკრაინის დანგრეული სოფლის კადრებს ვხედავთ.

Imagine Dragons-ის ახალი კლიპი 14 წლის უკრაინელი საშას ისტორიას მოგვითხრობს, რომელიც დაბომბვას გადაურჩა. საშას სოფელი 5 თვის განმავლობაში რუსების მიერ იყო ოკუპირებული. კლიპში ვხედავთ, რომ საშას სახლი და მთელი სოფელი დანგრეულია, ხოლო 14 წლის ბიჭის მეზობლები დაბომბვას ვერ გადაურჩნენ.

"საშას ისტორია გულდასაწყვეტია და მისნაირი კიდევ ათასობით ადამიანია, რომლებსაც დახმარება სჭირდებათ. საშას ოჯახს დღემდე არ აქვს ელექტროენერგია და საბაზისო საარსებო პირობები", — წერს Imagine Dragons ტვიტერზე და სოციალური ქსელების მომხმარებლებს მოუწოდებს, უკრაინელებს ფინანსურად დაეხმარონ.

შეგახსენებთ, რომ Imagine Dragons ომის დაწყების პირველივე დღეებიდან უკრაინის აქტიური მხარდამჭერია. ჯგუფი უკრაინელების ფინანსურ დახმარებაში აქტიურადაა ჩართული და არაერთ კონცერტზე ისინი უკრაინის დროშით გამოვიდნენ.