ცოტა ხნის წინ ნიუ-იორკის მეტროპოლიტენის მუზეუმში მეთ გალა 2023 ჩატარდა, რომელსაც Doja Cat ესწრებოდა. მომღერლის სამოსმა საზოგადოების ყურადღება მიიქცია, რადგან Doja Cat მეთ გალა 2023-თვის კარლ ლაგერფელდის კატის მსგავსად გამოეწყო. წლევანდელი მეთ გალა თანამედროვე მოდის ინდუსტრიის ლეგენდას, დიზაინერ კარლ ლაგერფელდს მიეძღვნა და მიწვეულმა სტუმრებმაც თავიანთი სამოსი კარლ ლაგერფელდს დაუკავშირეს.

Doja Cat-მა მეთ გალაზე Chanel-ის კაბა მოირგო, რომელსაც ფისოს ყურებიც ახლდა. რაც შეეხება მაკიაჟს, მომღერალს სახეზე სპეციალური ნიღაბი ეკეთა, რათა მისი ცხვირი და პირი კატას დამსგავსებოდა, ხოლო თვალები უფრო მაღლა აეწია.

ფოტო: Getty Images

"მოდის საშუალებით საკუთარი თავს გამოვხატავ. ასე რომ, ნებისმიერ დროს, როდესაც მსგავს რამეს ვაკეთებ, ეს ავანგარდული და არაჩვეულებრივია. სამოსი ჩემი თავის გამოხატვისა და იმის ჩვენების გზაცაა, ვისთან ერთადაც ვმუშაობ", — განაცხადა Doja Cat-მა მეთ გალას ჩაცმულობისა და მაკიაჟის შესახებ.

გარდა იმისა, რომ Doja Cat-ის წლევანდელი მეთ გალას ჩაცმულობა ინტერნეტმა აიტაცა, მომღერალმა მოდის ინდუსტრიის წარმომადგენლებიდანაც დადებითი შეფასებები მიიღო. "არავის ეცვა Doja Cat-ზე უკეთესად. მომღერლის ჩაცმულობამ ყველა აალაპარაკა", — განაცხადა შემოქმედებითმა ხელმძღვანელმა და სტილისტმა, ალან ნელსონმა.

ფოტო: Getty Images

Doja Cat-მა ინტერვიუში ისიც აღნიშნა, რომ გარეგნობასთან დაკავშირებული ნორმები არაფრად ჩააგდო, რადგან საკუთარი თავის მუდამ სერიოზულად აღქმა დამქანცველია და ასე ცხოვრებაში ბევრ გამოცდილებას თავადვე ზღუდავ.

შეგახსენებთ, რომ წლევანდელ მეთ გალაზე Doja Cat ერთადერთი არ ყოფილა, რომელმაც სამოსი კარლ ლაგერფელდის კატის ინსპირაციით შეარჩია. მეთ გალას წითელ ხალიჩაზე წელს გიგანტური ფისო გამოჩნდა, მოგვიანებით კი გაირკვა, რომ ის ჯარედ ლეტო ყოფილა.

ასევე იხილეთ: