რატომ არის მნიშვნელოვანი: როგორც ღონისძიების აღწერაში ვკითხულობთ, ის "მსოფლიოს გამორჩეული საერთაშორისო კონსერვატორთა შეკრებაა", რომელსაც უნგრეთი ზედიზედ მეორე წელია მასპინძლობს.

  • კონფერენცია ბუდაპეშტში 4-5 მაისს არის დაგეგმილი და მისი დევიზია — "ერთად ჩვენ ძლიერები ვართ".
  • ღონისძიებაზე მთავარი სიტყვით, უნგრეთის პრემიერმინისტრი, ვიქტრო ორბანი წარდგება.
  • ის ევროკავშირში რუსეთის პრეზიდენტის უახლოეს მოკავშირედ განიხილება.
  • ორბანი აცხადებს, რომ ოკუპანტ ქვეყანასთან ურთიერთობის გაწყვეტა "მათ ეროვნულ ინტერესებს ეწინააღმდეგება", ხოლო უკრაინას "ფინანსურად არარსებულ ქვეყანას" უწოდებს.

ღარიბაშვილი და ორბანი: ორი ქვეყნის პრემიერების პოლიტიკური სიმპათიები კარგად გამოჩნდა 2022 წლის ოქტომბერში, როდესაც ორბანს უნგრეთში ქართველ კოლეგას შეხვდა.

  • ღარიბაშვილმა თქვა, რომ ორბანის ლიდერობით და მისი მმართველობის დროს უნგრეთი ძალიან წარმატებული ქვეყანაა, რომელმაც ბევრი რეფორმა განახორციელა, საქართველომ კი მათგან არაერთი მაგალითი გადმოიღო.
  • გამოთქვა ორი ქვეყნის "უფრო მეტად დაახლოების სურვილიც".
  • პასუხად, ორბანმა არც ღარიბაშვილის მიმართ დაიშურა საქებარი სიტყვები და თქვა ისიც, რომ უკრაინისა და მოლდოვასგან განსხვავებით, საქართველოსთვის კანდიდატის სტატუსის არმინიჭება "დისკრიმინაციული გადაწყვეტილება იყო", რომელიც "ვერც მორალურად იქნება გამართლებული".

რა ვიცით ღონისძიებაზე: AP იანვარში წერდა, რომ კონფერენცია ძირითადად ამერიკელი და ევროპელი კონსერვატორების მონაწილეობით გაიმართება, რადგან ქვეყნის მემარჯვენე პოპულისტური მთავრობა, რომელიც ევროპაში ძირითადად იზოლირებულია, მოკავშირეებს და თანამოაზრეებს ეძებს.

  • ასევე, როგორც გამოცემა მიუთითებდა, ორგანიზატორები წერდნენ, რომ კონფერენცია "ფოკუსირებული იქნება ლიბერალების კოშმარზე: ეროვნული ძალების საერთაშორისო გაერთიანებაზე".
  • AP წერდა იმასაც, რომ კონფერენცია მიზნად ამერიკის მემარჯვენე ფრთასა და ორბანის ავტოკრატიულ მთავრობას შორის კავშირების გაღრმავებას ისახავს.
  • ორგანიზაცია The Centre, რომელიც ამ ღონისძიების ერთ-ერთი პარტნიორია, Twitter-ზე ღარიბაშვილის ფოტოს აქვეყნებს — როგორც აღწერაში ვკითხულობთ, მას მიაჩნია, რომ "საქართველო არის კონსერვატიული საზოგადოება, ქრისტიანობაზე დაფუძნებული უნიკალური ღირებულებებით".
  • ორგანიზაცია ღარიბაშვილს უწონებს ჰომოფობიას და წერს, რომ ის მხარს არ უჭერს "გენდერულ პროპაგანდას" და ასევე, მიიჩნევს, რომ აქტივისტები და პოლიტიკოსები ვალდებულნი არიან, პატივი სცენ უმრავლესობის ნებას.

გარდა ამისა, კონფერენციაზე ღარიბაშვილის დასწრებას ჰელსინკის კომისიის უფროსი მრჩეველი, მაიკლ ჰიკარი ჩეჩირე ასე ეხმაურება:

  • "ქართული ოცნების ახალი სტრატეგიაა: მოდი, დავემსგავსოთ ორბანს, მაგრამ ოკუპაციის პირობებში, ბევრად უფრო არასტაბილურ სამეზობლოში, ნაკლები სავაჭრო/ეკონომიკური უპრატესობებით, NATO/ევროკავშირის წევრობის გარეშე".