საერთაშორისო რესპუბლიკურმა ინსტიტუტმა (IRI-მ) ახალი კვლევა გამოაქვეყნა.

დეტალები: კვლევის თანახმად, რუსულ კანონზე გამოკითხულთა 46%-ს სმენია, 19%-მა კი ბევრი რამ არ იცის.

• მათგან, ვინც რუსულ კანონზე ინფორმირებულია, უმრავლესობა (42% — მტკიცედ, 18% — გარკვეულწილად) ფიქრობს, რომ ის ძირს გამოუთხრიდა საქართველოს დასავლურ მისწრაფებებს.
• 38%-ს მტკიცედ სჯერა, რომ რუსული კანონი მიზნად ისახავს სამოქალაქო საზოგადოებისა და მედიის გაჩუმებას.
• 38%-ის აზრით კი, მისი მიღება საქართველოს რუსეთთან აახლოებს.

კონტექსტი: მიმდინარე წელს ანტიდასავლური, პრორუსული და ქართული ოცნებისგან ფორმალურად გამიჯნული ხალხის ძალა, მმართველ გუნდთან შეთანხმებით, აპირებდა მიეღო რუსული კანონი, რომელსაც უცხოური გავლენის აგენტებად უნდა გამოეცხადებინა დამოუკიდებელი მედია და არასამთავრობო სექტორი.

• ინიციატორებს კანონის გაწვევა მზარდი საზოგადოებრივი პროტესტის შემდეგ მოუწიათ — 7-8 მარტის აქციები სამართალდამცველებმა არაერთხელ დაშალეს წყლის ჭავლის, წიწაკის სპრეისა და ცრემლსადენი გაზის გამოყენებით, მოგვიანებით კი დარბევაზე გადავიდნენ. სათითაოდ მისდევდნენ, სცემდნენ და აკავებდნენ აქციის მონაწილეებს.
• მარტის აქციებზე დაშავდა მედიის არაერთი წარმომადგენელი — მათ სამართალდამცველები ფიზიკურად უსწორდებოდნენ, მიუხედავად იმისა, რომ იცოდნენ, ისინი ასრულებდნენ პროფესიულ მოვალეობას.

რატომ არის მნიშვნელოვანი: საერთაშორისო რესპუბლიკური ინსტიტუტის ახალი საზოგადოებრივი აზრის კვლევა (Center for Insights in Survey Research) კიდევ ერთხელ აჩვენებს, რომ საქართველოს ევროკავშირში გაწევრიანებას მტკიცე მხარდაჭერა აქვს.

• გამოკითხულთა 89% სრულად ან მეტ-ნაკლებად უჭერს მხარს საქართველოს ევროკავშირში გაწევრიანებას — მხარდაჭერა, წინა კვლევასთან შედარებით, 4%-ით არის გაზრდილი და ისტორიულ მაქსიმუმს აღწევს.
• ამავდროულად, საქართველოს მოქალაქეები არ უჭერენ მხარს ქვეყანაში რუსეთის მოქალაქეების ყოფნას — გამოკითხულთა 79% წინააღმდეგია, მათ ბიზნესის რეგისტრაციის, ქონების შეძენის ან საქართველოში უვიზოდ შემოსვლის უფლება ჰქონდეთ.
• გარდა ამისა, კვლევის მიხედვით, პოლიტიკური პარტიების მიმართ ნდობის მაჩვენებელი დაბალია — გამოკითხულთა 42% აცხადებს რომ არცერთი პოლიტიკური პარტია არ გამოხატავს მათ ინტერესებს, ხოლო, საზოგადოების 78% -ს პოლიტიკაში მეტი ახალგაზრდის ხილვა სურს.

მეთოდოლოგია: IRI-ის ინფორმაციით, კვლევა ჩატარდა 2023 წლის 4-23 მარტის პერიოდში საერთაშორისო რესპუბლიკური ინსტიტუტის კვლევების ცენტრის სახელით, ბალტიის კვლევებისა და გელაპის ორგანიზაციის წარმომადგენლის დოქტორი რასა ალიშაუსკინეს მიერ.

• საველე სამუშაოები ჩატარდა IPM-ის მიერ, მონაცემები შეგროვდა პირისპირ ინტერვიუს გზით.
• შერჩევა მოიცავდა საარჩევნო ხმის უფლებისა და ასაკის მქონე 1 500 რესპონდენტს.
• მონაცემები შეწონილ იქნა ასაკის, სქესის, რეგიონისა და დასახლების ზომის შესაბამისად.
• ცდომილების ზღვარი წარმოადგენს +/- 2.5 %, გამოპასუხების მაჩვენებელი — 63%.
• კვლევის განხორციელება შესაძლებელი გახდა ამერიკელი ხალხის მხარდაჭერით, აშშ-ის საერთაშორისო განვითარების სააგენტოს მეშვეობით.