უწყება შსს-ს სამინისტროს ცალკეულ თანამშრომელთა მხრიდან მარტის საპროტესტო აქციებზე სამსახურებრივი უფლებამოსილების შესაძლო გადამეტების ფაქტებს იძიებს.

რატომ არის მნიშვნელოვანი: სპეციალურ საგამოძიებო სამსახურში შესაძლო კანონსაწინააღმდეგო ქმედებების თაობაზე სხვადასხვა უწყებიდან ჯამში 123 შეტყობინება შემოვიდა.

  • შეტყობინებები ეხებოდა აქციის მონაწილეების და ცალკეული ჟურნალისტების უფლებების დარღვევას.

დეტალები: გამოძიება ცალკე ეპიზოდად მიმდინარეობს 2023 წლის 8 მარტს აქციაზე ზურაბ გირჩი ჯაფარიძის და ნიკა მოსიაშვილის მიმართ განხორციელებული სამსახურებრივი უფლებამოსილების ძალადობით შესაძლო გადამეტების ფაქტზე.

  • გამოძიების შესწავლის საგანს ასევე წარმოადგენს მასმედიით გავრცელებული ვიდეოკადრების მონიტორინგის შედეგად სამსახურის მიერ გამოვლენილი სამართალდამცავი ორგანოს თანამშრომლების მხრიდან სხვადასხვა პირის მიმართ განხორციელებული ძალის შესაძლო გადამეტების ფაქტებიც.
  • სპეციალური საგამოძიებო სამსახურის ცნობით გამოძიების დაწყებიდან დღემდე გამოკითხულია 91 მოქალაქე (მათ შორის 19 ჟურნალისტი).

ზურაბ გირჩი ჯაფარიძის და ნიკა მოსიაშვილის ეპიზოდთან დაკავშირებით, უწყება აცხადებს რომ რომ შემთხვევის ადგილზე განთავსებული საჯარო დაწესებულების სამეთვალყურეო ვიდეოკამერების ჩამწერი მოწყობილობა ტექნიკურად იყო დაზიანებული და მასზე წვდომა ტექნიკური მიზეზების გამო იყო შეუძლებელი.

  • სპეციალურ საგამოძიებო სამსახურში აცხადებენ, რომ აქტიურად მიმდინარეობს გამოძიება აქციაზე დაშავებული ზაზა ბიღიაშვილის ეპიზოდთან დაკავშირებით, რომელიც ორჯერ დაიკითხა.
  • სპეციალური საგამოძიებო სამსახური განაგრძობს საგამოძიებო და საპროცესო მოქმედებების ჩატარებას.
  • "შესაბამისი მტკიცებულებების მოპოვების და დანაშაულში მხილებული პირების იდენტიფიცირების შემთხვევაში სამსახური გაატარებს კანონით გათვალისწინებულ სამართლებრივ ღონისძიებებს", — ნათქვამია უწყების გავრცელებულ განცხადებაში.