და აი ისიც, მიღწეული წარმატების შემდეგ OpenAI-ის ჰუმანოიდი რობოტების შექმნა სურს. კომპანიის მიერ შემუშავებულმა ChatGPT-იმ მსოფლიო დაიპყრო და როგორც ჩანს, ახლა შემდეგი ეტაპის ჯერია — OpenAI-ის თავისი ენობრივი მოდელისთვის ფიზიკური სხეულის შესხმა სურს.

როგორც New Atlas იტყობინება, OpenAI-იმ ნორვეგიული რობოტიკის კომპანია 1X-ში მნიშვნელოვანი ინვესტიცია ჩადო. საუბარია 23,5 მილიონ დოლარზე.

"1X ამ ყველაფრით აღფრთოვანებულია. გვიხარია, რადგან OpenAI-სთან თანამშრომლობა ჩვენთვის პატივია. ჩვენი სურვილია რობოტიკის ადამიანების ყოველდღიურ ცხოვრებაში ინტეგრირება", — თქვა ბერნტ იოვინდ ბორნიჩმა, აღმასრულებელმა დირექტორმა და 1X-ის დამფუძნებელმა განცხადებაში.

კომპანიაში ამბობენ, რომ ინვესტორების მხარდაჭერით გააგრძელებენ პროგრესს და საბოლოოდ გააძლიერებენ შრომის გლობალურ ბაზარს.

ეს ინვესტიცია რობოტიკაში ახალი ეტაპია OpenAI-სთვის, რომელიც 2021 წელს საკუთარი რობოტიკის განყოფილების დახურვის შემდეგ მსგავს მიმართულებას ერიდებოდა.

ამ დროისთვის, 1X-ისა და OpenAI-ის თანამშრომლობასთან დაკავშირებით მეტი არ ვიცით. თუმცა, ერთი რამ ცხადია, ორივე მხარე სრულად არის დაინტერესებული ახალი ჰუმანოიდი რობოტების შემუშავებით.

ChatGPT სხეულით?

ჩვენ ჯერ კიდევ არ ვიცით, როგორი იქნება OpenAI-ისა და 1X-ის თანამშრომლობის შედეგი, მაგრამ სიახლეებს 2023 წლის ზაფხულისთვის უნდა ველოდეთ. სწორედ ამ დროს შეიძლება შევიტყოთ მეტი 1X-ის რობოტ "NEO"-ზე.

და მაინც, ეს შეიძლება დასაწყისი იყოს პროცესის, რომელიც ChatGPT-ისთის სხეულის შესხმას გულისხმობს. მსოფლიოში ყველაზე ცნობილ ჩეთბოტს დღეს კონკრეტული სხეული არ გააჩნია, მაგრამ მასთან საუბარი ძალიან საინტერესო და შემეცნებითია. ახლა კი, წარმოიდგინეთ ChatGPT, რომელსაც ადამიანის მსგავს სხეულში ჩაშენებულს ეკონტაქტებით.