ამის შესახებ ჯანდაცვის მინისტრის მოადგილემ, ილია ღუდუშაურმა საზოგადოებრივი მაუწყებლის ეთერში ისაუბრა.

რატომ არის მნიშვნელოვანი: ზურაბ აზარაშვილთან შეხვედრის მიუხედავად, რესპუბლიკურ საავადმყოფოში დღეს პროტესტი ისევ გაგრძელდა.

  • თანამშრომლები მოითხოვდნენ, რომ საავადმყოფოს დირექტორი შეცვლილიყო, რადგან მათთვის მნიშვნელოვანია ადამიანი, რომელიც კლინიკას მძიმე პერიოდში უხელმძღვანელებს, მათი მაღალი დნობა ჰქონდეს.
  • "მან ბევრი საკითხი უნდა გადაწყვიტოს მაღალი ნდობით", — განაცხადა ექიმმა გიორგი დუნდუამ.
  • ზურაბ აზარაშვილი გუშინ, 10 აპრილს, რესპუბლიკური საავადმყოფოს თანამშრომლებს შეხვდა და განაცხადა, რომ შეჯერდნენ.
  • დღეს კი თქვა, რომ წინა დღეებთან შედარებით პროტესტი მინელებულია და ამის გაგრძელების არანაირი საფუძველი არ არსებობს.

დეტალები: ილია ღუდუშაურის განცხადებით, რესპუბლიკური საავადმყოფოს დირექტორმა, ზაზა ავალიანმა თანამდებობა დატოვა და ტუბერკულოზის და ფილტვის ცენტრში გააგრძელებს მუშაობას.

  • მისი განცხადებით, გენერალური დირექტორის მოვალეობას შეასრულებს თეა თავართქილაძე, რომელსაც ამ დრომდე კლინიკური მენეჯერის პოზიცია ეკავა.
  • ღუდუშაურის თქმით, სამინისტრომ შექმნა თანამშრომლების სპეციალური ჯგუფი, რომლებიც შემდეგი რამდენიმე დღის და კვირის განმავლობაში უშუალოდ რესპუბლიკურ საავადმყოფოში იქნებიან.