რატომ არის მნიშვნელოვანი: 22 მარტს რესპუბლიკურის თანამშრომლები ითხოვდნენ, რომ არ შეცვლილიყო კლინიკის ადგილმდებარეობა.

• ამბობდნენ, რომ ჯანდაცვის მინისტრმა შენობის ნგრევა მათთვის სრულიად მოულოდნელად, ახალი მდებარეობისა და კონცეფციის გაურკვევლად დააანონსა.
• მათივე თქმით, ერთი წლის წინ რესპუბლიკურის მედპერსონალს სრულიად განსხვავებული ინფორმაცია მიეწოდა შენობის რეაბილიტაციაზე.
• ჯანდაცვის მინისტრის მოადგილემ, თამარ გაბუნიამ რესპუბლიკური საავადმყოფოს კომერციალიზაცია გამორიცხა.
• 29 მარტს საავადმყოფოს თანამშრომლებმა აქციაზე სამი ძირითადი მოთხოვნა გააჟღერეს, მათ შორის, პრემიერმინისტრთან შეხვედრა.
• საკითხზე ისაუბრეს ამირან გამყრელიძემ და ეკატერინე ტიკარაძემ.
• ზურაბ აზარაშვილმა განაცხადა, რომ იღებენ სრულ პასუხისმგებლობას თანამშრომლების დასაქმებაზე და იმ ანაზღაურების გადახდაზე, რომელიც დააწესეს.
• "იმ შემთხვევაში, კი თუ მათ ვერ დავასაქმებთ, ჩვენ მათ ხელფასს მაინც გადავუხდით. ჩვენ ამას ყველანაირი ხელშეკრულებებით გავამყარებთ", — თქვა მინისტრმა.

ზურაბ აზარაშვილი გუშინ, 10 აპრილს, რესპუბლიკური საავადმყოფოს თანამშრომლებს შეხვდა და განაცხადა, რომ შეჯერდნენ, "იქნება დემონტაჟი, რეაბილიტაცია თუ სართულების ცვლილება."

• "შევთანხმდით კომუნიკაციის ფორმებზე. გარკვეული ინფორმაციის მიღების შემდეგ მათ გავაცნობთ და მათთან ერთად შევჯერდებით იმ გადაწყვეტილებაზე, რაც იქნება კლინიკის დემონტაჟი, რეაბილიტაცია თუ სართულების ცვლილება", — განაცხადა აზარაშვილმა.
• მისივე განმარტებით, ხუთი სხვადასხვა ტიპის დასკვნას ელოდებიან და ქვეყნის გარეთ სხვადასხვა ექსპერტის ჩართულობით მოქმედებენ.

დეტალები: ექიმი გიორგი დუნდუა ფორმულასთან ამბობს, რომ გუშინდელი შეხვედრა საკმაოდ საინტერესო და კონსტრუქციული იყო და სამინისტროს მხარემ მათ კლინიკის განვითარების სამომავლო სტრატეგია წარუდგინა.

• ამბობს, რომ წარმოდგენილი სტრატეგია თანხვედრაშია მათ სურვილთან, რომ კლინიკა იყოს სრულად აღჭურვილი, ძირითადი შეუთანხმებლობა კი რეკონსტრუქციის გზებზეა.
• მისი განცხადებით, მათი სურვილია, რომ კლინიკამ ფუნქციონირება არ შეწყვიტოს და მუშაობის უწყვეტ რეჟიმში მოხდეს რეაბილიტაცია.
• დუნდუას განცხადებით, ექსპერტებს ნახევარი წლიდან რვა თვემდე სჭირდებათ, რომ დასკვნისთვის.
• "ჩვენი შეკრების მიზანი რჩება, რომ მოხდეს დირექტორის შეცვლა. ეს საკითხი რატომ არის მნიშვნელოვანი ჩვენთვის, რომ მაღალი ნდობა უნდა ჰქონდეს ჩვენგან ადამიანს, რომელიც იქნება ამ რთულ ვითარებაში კლინიკის ხელმძღვანელი. მან ბევრი საკითხი უნდა გადაწყვიტოს მაღალი ნდობით", — განაცხადა გიორგი დუნდუამ.