რატომ არის მნიშვნელოვანი: დღეს, 30 მარტს თბილისის ქუჩებსა და მეტროსადგურებში ოპოზიციის მადისკრედიტირებელი პლაკატები გამოჩნდა.

  • მათზე წერია "მოღალატე ჯაშუშები", "ეკლესიის მაგინებელი ჯაშუშები".

თბილისის მერის, კახა კალაძის განცხადებით, მეტროში პლაკატების გაკვრაზე არავის მხრიდან ყოფილა ნებართვა გაცემული და ვერც იქნებოდა.

  • "სამწუხაროდ, უნდა აღინიშნოს, რომ ძალიან ხშირად ხდება დედაქალაქის სხვადასხვა ქუჩაზე, სხვადასხვა სახის პლაკატის გაკვრა, რაც შეიძლება, კანონსაწინააღმდეგო იყოს";
  • "მსგავს ფაქტებს ჩვენი მხრიდან ყოველთვის მოჰყვება რეაგირება — შესაბამისი სამსახურების მიერ ხდება პლაკატების ჩამოხსნა და იგივე მოხდება ამ შემთხვევაშიც", — აცხადებს კალაძე.

აქამდე გააკრეს პლაკატები, სადაც უცხოური გავლენის აგენტების შესახებ კანონპროექტის მხარდამჭერები არიან გამოსახული და საქართველოს სირცხვილი აწერია.

  • "რუსული ოცნების და რუსულ კანონზე ხელმომწერების პოსტერები დედაქალაქში — როცა ქვეყანას ღალატობ, პუტუნისტობ და საქართველოს, ოკუპანტ ქვეყანაში ექაჩები, შესაბამისი რეაქცია აქვს ხალხს", — დაწერა ხაბეიშვილმა.

ქართული ოცნება აცხადებს, რომ პლაკატების გამოკვრით პოლარიზაციის ინიციატორები ოპოზიციის წარმომადგენლები არიან.

  • "გუშინ სიყვარულის ენის შემცველი იყო ეტყობა, დღეს სიძულვილის ენის შემცველია. აქაც ორმაგი სტანდარტია“, — თქვა მამუკა მდინარაძემ.