რამდენიმე კვირის წინ, 16 წლის სალომე კენჭიაშვილი საქართველომ გაიცნო — რუსული კანონპროექტის საპროტესტო აქციებზე "წყლის ჭავლთან მოცეკვავე" მოზარდი საქართველოს დროშით ხელში ამ რთული დღეების ერთ-ერთ სიმბოლოდ იქცა.

მოგვიანებით, სალომეზე უფრო მეტი რამ გავიგეთ — იგი ტაეკვანდოში საქართველოს ორგზის ჩემპიონი ყოფილა. რადიო თავისუფლებასთან ინტერვიუში იმასაც ამბობს, რომ მისი ოცნება ევროპაში მოგზაურობაა.

"არ მინდა, ერთ დღეს საქართველოში გავიღვიძო და ხელში რუსული პასპორტი მქონდეს", — ამბობს სალომე, — "ოცნებად მაქვს ევროპაში მოგზაურობა და რუსული პასპორტით მაგას ნამდვილად ვერასდროს ვერ შევძლებ".

სანუკვარი ოცნებები კი ხშირად ხდება ხოლმე — სულ ცოტა ხნის წინ გავიგეთ, რომ სალომე ევროპაში გაემგზავრება. სააგენტო One World-ის ცნობით, იგი ბუდაპეშტის 2-კვირიან საზაფხულო სკოლაში მიიღებს მონაწილეობას.

საქართველოს პარლამენტმა ეგრეთ წოდებული უცხოური გავლენის აგენტების შესახებ რუსული კანონის ინიციატივა რამდენიმე კვირის წინ მიიღო, რასაც ქვეყანაში მასობრივი პროტესტი მოჰყვა — როგორც რიგითი მოქალაქეების, ასევე სხვადასხვა სფეროში ცნობილი ადამიანების მხრიდან. დეპუტატებმა აღნიშნული კანონი 7 მარტს პირველი მოსმენით მიიღეს, მაგრამ საზოგადოების უმწვავესი რეაქციის და დემონსტრაციების შემდეგ, მისი "გაწვევა" გადაწყვიტეს და 10 მარტს მეორე მოსმენით ჩააგდეს.

ასევე იხილეთ: