ჟურნალისტური ეთიკის ქარტია სამთავრობო მედია POSTV-ზე, რომლის საკონტროლო პაკეტსაც ანტიდასავლური მოძრაობის, ხალხის ძალის წევრი, ვიქტორ ჯაფარიძე ფლობს, განცხადებას ავრცელებს.

რატომ არის მნიშვნელოვანი: მას შემდეგ, რაც პარლამენტმა რუსული კანონი მეორე მოსმენით ჩააგდო, სამთავრობო პროპაგანდისტულმა მედია POSTV-მ მადისკრედიტირებელი კამპანიის წამოიწყო მათ წინააღმდეგ, ვინც კანონს აპროტესტებდა.

  • ამასთან, ტელეკომპანიაში არა ერთხელ მიიწვიეს კანონის ინიციატორები თუ მომხრეები, საიდანაც ისინი პროპაგანდისტულ, დეზინფორმაციულ გზავნილებს ავრცელებენ.
  • მაგალითად, POSTV-დან მიმართა მიხეილ ყაველაშვილმა მწერალ დათო ტურაშვილს და მას "ანწუხელიძის სისხლს ამოფარებული ნაძირლების მიერ დაშოვნი ფულით შექმნილ ტელევიზიაში" მომუშავე უწოდა.
  • გუშინ, 19 მარტს ფორმულას ეთერში, გადაცემა მე-17 სართულში დათო ტურაშვილმა მის წინააღმდეგ აგორებულ დეზინფორმაციის კამპანიაზე ისაუბრა, ემოციური მიმართვა ჰქონდა და ჩანდა, რომ შეუძლოდ იყო.
  • მოგვიანებით, ცნობილი გახდა, რომ მწერალი კლინიკაში გადაიყვანეს.

ქარტიის განცხადებით, იქმნება შთაბეჭდილება, რომ რუსული კანონის მიზნებს ახლა სწორედ ეს მედია ასრულებს.

  • ამასთან, არის დისკუსიები, რომლიც მიზანიც მხოლოდ ევროსკეპტიციზმის გაზრდაა მოსახლეობაში.
  • მიუთითებენ, რომ მედიის როლი არ არის კონკრეტული პირების მიმართ მადისკრედიტირებელი კამპანიის წარმოება, ასევე, მედია არ უნდა უწყობდეს ხელს სიძულვილის გაღვივებასა და საზოგადოების პოლარიზებას.
  • "მედია, როგორც მეოთხე ხელისუფლება, არ უნდა ცდილობდეს საქართველოს კონსტიტუციით განსაზღვრული ქვეყნის კურსის საწინააღმდეგო კამპანიების წარმოებას", — ნათქვამია განცხადებაში.

გარდა ამისა, ქარტიაში აღნიშნავენ, რომ მედია ვალდებულია დაიცვას საერთაშორისოდ აღიარებული ეთიკური ჟურნალისტური სტანდარტები და საზოგადოებას მიაწოდოს სწორი და გადამოწმებული ინფორმაცია.

  • "საქართველოს ჟურნალისტური ეთიკის ქარტია მიიჩნევს, რომ ყველა მედიასაშუალებას, მათ შორის POSTV-ის, უნდა ახსოვდეს მედიის როლი და დანიშნულება", — მიუთითებენ ისინი.