დავით უსუფაშვილის ახალ მოძრაობაში ეროვნული ფორუმის რამდენიმე წევრი: ანი მიროტაძე, კახა შარტავა, სოსო ვახტანგიშვილი, რეზო შავიშვილი და მოჭადრაკე ნინო გურიელი ერთიანდებიან. ამ ინფორმაციას On.ge-სთან საუბრისას ადასტურებს ანი მიროტაძე.

მიროტაძე მოძრაობის პრეზენტაციამდე, რომელიც რამდენიმე საათშია ჩანიშნული, არ ამხელს კიდევ ვინ არიან მათი წევრები. თუმცა, ამბობს, რომ მოძრაობაში გაერთიანდნენ, როგორც პოლიტიკოსები, ასევე სხვადასხვა სფეროში წარმატებული ადამიანები.

"დღეს არ ფუძნდება პარტია, ფუძნდება მოძრაობა. ეს იქნება მოძრაობა, რომელიც საბოლოო ჯამში, ჩამოყალიბდება პარტიად, თუ როგორ იქნება, ეს არის მომავლის ამბავი," - ამბობს მიროტაძე.

რესპუბლიკური პარტიის ყოფილ ლიდერსა და საქართველოს პარლამენტის ყოფილ თავმჯდომარის, დავით უსუფაშვილის ეროვნული ფორუმის წევრებთან მოლაპარაკებების შესახებ On.ge-მ 18 მაისს დაწერა. მანამდე კი, ეროვნული ფორუმის შესაძლო დაშლის შესახებ ინფორმაცია საზოგადოებრივმა მაუწყებელმა გაავრცელა.

რესპუბლიკური პარტიაც და ეროვნული ფორუმიც ქართული ოცნების კოალიციაში იყო გაერთიანებული და ამ პარტიების წარმომადგენლები წინა მოწვევის პარლამენტის დეპუტატებიც იყვნენ.