საერთაშორისო საბიუჯეტო პარტნიორობამ განცხადება გაავრცელა.

რატომ არის მნიშვნელოვანი: 12 მარტს, იმედის ეთერში ირაკლი ღარიბაშვილმა თქვა, რომ საქართველოს მთავრობა ითვლება მსოფლიოში ერთ-ერთ ყველაზე გამჭვირვალე ხელისუფლებად მოწინავე დემოკრატიებს შორის.

  • "ბიუჯეტის გამჭვირვალობის მიხედვით, ჩვენ ვართ პირველ ადგილზე მსოფლიოში", — ამბობდა პრემიერი.
  • საპასუხოდ, საერთაშორისო საბიუჯეტო პარტნიორობა (IBP) იმედგაცრუებას გამოხატავს, რომ ღარიბაშვილმა არასწორად ახსნა ქვეყნის რეიტინგი, რათა რუსული კანონი გაემართლებინა.

დეტალები: IBP-ის განცხადებით, შეშფოთებულები არიან, რომ საქართველოს მთავრობამ დაარბია ათასობით ადამიანი, რომლებიც მშვიდობიანი გზით აპროტესტებდნენ ძლიერი სამოქალაქო საზოგადოების შემზღუდავ კანონს.

  • "იმედგაცრუებული ვიყავით, როცა დავინახეთ, რომ საქართველოს პრემიერმინისტრმა არასწორად ახსნა ქვეყნის რეიტინგი ღია ბიუჯეტის კვლევაში კანონის გასამართლებლად", — ნათქვამია განცხადებაში.
  • საბიუჯეტო პარტნიორობის თანახმად, ღია ბიუჯეტის კვლევა ზომავს გამჭვირვალობას, ზედამხედველობასა და საჯარო მონაწილეობას ეროვნულ საბიუჯეტო პროცესებში, შესაბამისად, საქართველოს ქულა ნიშნავს, რომ მთავრობამ მთავარ საბიუჯეტო დოკუმენტებში გამოაქვეყნა დროული და ამომწურავი ინფორმაცია.
  • "თუმცა, ეს არ ნიშნავს, რომ საქართველო საბიუჯეტო პროცესის მიღმა არის სრულად გამჭვირვალე, ანგარიშვალდებული და ინკლუზიური საზოგადოებასთან. დამოუკიდებელმა შეფასებებმა აჩვენა მაღალი დონის კორუფციის მზარდი, შემაშფოთებელი ნიშნები. ხელისუფლების მიერ პოლიციის ძალის არაპროპორციული გამოყენება მომიტინგეების წინააღმდეგ ხაზს უსვამს, საქართველოში სულ უფრო ნაკლები სივრცე რჩება მშვიდობიანი შეკრებისა და გამოხატვის თავისუფლებისთვის", — ვკითხულობთ განცხადებაში.

IBP ხაზს უსვამს, რომ არ მიიღებენ საქართველოს მთავრობის მიერ ღია ბიუჯეტის კვლევის რეიტინგის გამოყენებას დრაკონული კანონის გასამართლებლად.

  • "ძლიერი და დამოუკიდებელი სამოქალაქო საზოგადოება აუცილებელია საჯარო სექტორის ღიაობისა და ანგარიშვალდებულების უზრუნველსაყოფად და დემოკრატიული საზოგადოებების არსებითი წინაპირობაა. ჩვენ მოვუწოდებთ საქართველოს მთავრობას, მოუსმინოს თავის ხალხს, ვინც ისწრაფვის უფრო დემოკრატიული მომავლისკენ".