რატომ არის მნიშვნელოვანი: სპეცრაზმი აქციას წყლის ჭავლით და ცრემლსადენი გაზით 6-ზე მეტი საათის განმავლობაში შლიდა, თუმცა უშედეგოდ, შემდეგ კი დარბევაზე გადავიდა.

  • როგორც ადგილზე მყოფი On.ge-ის ჟურნალისტები ჰყვებიან, დილის 5 საათიდან პარლამენტთან განლაგებული რობოკოპები დაიძრნენ, მათ წინ წყლის ჭავლის მანქანა მოდიოდა, რომელიც აქტივისტებს უმიზნებდა და გზას ასე "წმენდდა".
  • პარალელურად ისროდნენ ცრემლსადენი გაზის ჭურვებსაც და იმდენად ბევრს, რომ ხალხი ტერიტორიიდან გასვლას ვერ ასწრებდა და ცუდად ხდებოდა.
  • აქციის მონაწილეთა ნაწილი გარიდებას და უსაფრთხო ადგილის პოვნას ცდილობდა, მაგრამ ვინც პოლიციას ჩაუვარდა ხელში, ძალის გამოყენებით დააკავეს და იძალადეს.

დეტალები: ენმ-ის ლიდერის, ლევან ხაბეიშვილის თქმით, აქციაზე მივიდა პირი, ზვიად ხარაზიშვილი, რომელიც 20 ივნისის დარბევას ხელმძღვანელობდა და "სისასტიკით გამოირჩევა".

  • პუბლიკას მიერ გავრცელებულ ვიდეოში ჩანდა, რომ აქციის მონაწილე დაკავებისას შეუძლოდ ხდება. პოლიციელებს ეუბნება მას, რომ ემორჩილება, თუმცა მაინც მიჰყავთ, შემდეგ კი გული მისდის — სამართალდამცავები მას ასულიერებენ და შსს-ის მანქანაში სვამენ.
  • ფორმულას გავრცელებულ ვიდეოში კი ჩანს, რომ სპეცრაზმელი მოქალაქეს სახეში მუშტს ურტყამს, ის ძირს ეცემა. ჟურნალისტების კითხვაზე, რატომ დაარტყა, სპეცრაზმელი არ პასუხობს.
  • ასევე, ვრცელდება კადრები, რომელშიც ასახულია, როგორ ურტყამს რამდენიმე სპეცრაზმელი დაბლა დავარდნილ მოქალაქეს.