ტელეკომპანია მაესტრომ დღეიდან, 13 ივნისიდან, მაუწყებლობა ტელეკომპანია იმედის შენობიდან დაიწყო. არხის დირექტორის, ზურაბ ნაყეურის თქმით, შენობა, საიდანაც მაესტრო მაუწყებლობდა მის მფლობელს, მაკა ასათიანს დარჩება. მაესტრო კი ოფიციალურად იმედის საკუთრებაში უახლოეს ერთ კვირაში გადავა.

მაესტროს დირექტორი, ზურაბ ნაყეური On.ge-სთან საუბრისას ამბობს, რომ მაესტროსა და იმედის ზოგიერთი სამსახურის (მძღოლები, ტექნიკური პერსონალი, კავშირგაბმულობა და ა.შ.) ოპტიმიზაცია და გაერთიანება მოხდება, თუმცა, ეს არ შეეხება საინფორმაციო სამსახურს. ამის მიუხედავად, რამდენიმე დღის წინ დაიხურა მაესტროს რეგიონული სამივე ოფისი გორში, ქუთაისსა და ბათუმში. მიზეზი, ამ შემთხვევაშიც, ხარჯების ოპტიმიზაციაა.

ნაყეურის თქმით, განახლებულ არხზე დარჩება სერიალები, ახალი ამბები და ტოქშოუ. თუმცა, მაესტროზე ამ დრომდე საინფორმაციო პროგრამის გარდა გადაცემა ან სერიალი არ გასულა. დირექტორი განმარტავს, რომ არხზე, ბოლო რამდენიმე დღე, საინფორმაციო გამოშვების ნაცვლად კოლაჟი იმედში "გადაბარგების" გამო გადიოდა. განახლებულ ეთერში კი, მთავარი საინფორმაციო გამოშვების დაწყების დრო ისევ შეიცვლება და 20 საათის ნაცვლად 21 საათი იქნება.

"ახალი სეზონისთვის თუ რამე გადაცემას მოიფიქრებენ [პროდიუსერები], ჩვენ ღია ვართ," - ამბობს ნაყეური.

2017 წლის თებერვალში არხზე ჟურნალისტი ეკა ფირცხალავა დასაქმდა, რომლის გეგმაც მაესტროს ახალი ამბების არხად გადაკეთება იყო. ფირცხალვა On.ge-სთან ინტერვიუზე შეთანხმების მიუხედავად, სატელეფონო ზარებას არ პასუხობს.

ტელეკომპანია იმედმა 2016 წლის 27 დეკემბერს მფლობელის - ჰოლდინგი იმედის განცხადება გაავრცელა. განცხადების მიხედვით, ჰოლდინგმა მაესტროს საკონტროლო პაკეტი შეიძინა და 2017 წლიდან მაესტრო იმედის ნაწილი ხდებოდა. თუმცა, საჯარო რეესტრში მაესტროს წილების ცვლილების შესახებ ინფორმაცია ამ დრომდე ასახული არაა.