პირველი ან მეორე ტიპის დიაბეტის მქონე ადამიანმა ყოველთვის უნდა იცოდეს მის სისხლში არსებული შაქრის დონე. ამ პროცესს დიდი დრო მიაქვს და საკმაოდ ინვაზიურია - როგორც წესი, ადამიანმა თითზე სპეციალური მოწყობილობით უნდა იჩხვლიტოს, სისხლი გამოიდინოს და სატესტო ფირფიტაზე დაადოს.

არსებობს სხვა გზაც, მაგრამ არც ესაა მთლად სასიამოვნო და მარტივი - მოწყობილობა კანქვეშ თავსდება, რომელიც სისხლში არსებულ შაქრის დონეს მუდმივად ზომავს და ინფორმაციას გარე მოწყობილობას გადასცემს.

მკვლევართა გუნდმა ჰარვარდიდან და MIT-იდან საინტერესო ალტერნატივა შემოგვთავაზეს. სპეციალური მელნის გამოყენებით, მათ ბიომგრძნობიარე ტატუ გამოიგონეს, რომელიც ფერს სისხლში არსებული შაქრის დონის მიხედვით იცვლის.

მას DermalAbyss-ის მელანი ეწოდება. გამოგონება ჯერ-ჯერობით ტესტირების ფაზაშია და საზოგადოებისათვის ხელმისაწვდომი არ არის.

ტატუს შეუძლია გიჩვენოთ როგორც მჟავიანობის დონეები, ასევე სისხლში არსებული ნატრიუმისა და გლუკოზის კონცენტრაცია.

გლუკოზის მომატების შემთხვევაში მელანი ყავისფერი გახდება, ხოლო ზედმეტი ნატრიუმის შემთხვევაში - მწვანე. მეწამული და ვარდისფერი მჟავიანობის დონის ცვლილებაზე მიუთითებს.

„DermalAbyss-ის მელანი წარმოადგენს ახალ მიდგომას ბიოინტერფეისებთან, რომელშიც სხეულის ზედაპირი გადაიქცევა ინტერაქტიულ ეკრანად“, ასე ხსნის გუნდი თავის პროდუქტს სარეკლამო ვიდეოში

დინამიკური მელანი პირდაპირ სისხლს არ არის „ჩაჭიდებული“. ის ქსოვილურ სითხეს აკონტროლებს - სუბსტანცია, რომელიც გარს აკრავს ცხოველების ქსოვილურ უჯრედებს. წყალი, იონები და სხვა ხსნადი ნივთიერებები - მარილების, შაქრის, ცხიმების, ამინომჟავებისა და ჰორმონების ჩათვლით - კაპილარებში ამ სითხის გავლით მოძრაობს.

ტატუ ამჯერად ღორის კანზე დაიტესტა, რომელიც ძალიან წააგავს ჩვენს კანს. ის მუშაობს, თუმცა საბოლოო დასკვნისთვის კლინიკური კვლევებია საჭირო. გასარკვევია, არსებობს რამე ალერგიული რეაქციები, რაც ადამიანებს მელნის მიმართ შეიძლება ჰქონდეთ?

ყველაფრის მიუხედავად, მაინც სწორი იქნება, თუ ვიტყვით, რომ ტატუ დიდი ხნის გადაუჭრელი პრობლემის გადაწყვეტის ახალი და ელეგანტური გზაა. რა თქმა უნდა, მეთოდი მაინც ინვაზიურია, მაგრამ მხოლოდ პირველ ჯერზე.

მკვლევარები ამბობენ, რომ ამ მელნით ნებისმიერი ფორმის ტატუს გაკეთება შეიძლება. ასე რომ, შეგიძლიათ თქვენი საყვარელი გმირი დაიხატოთ, ან ფრაზა წაიწეროთ და თან სისხლიც იკონტროლოთ.