საქართველო მსოფლიო ჩემპიონატს ფრისტაილში, სნოუბორდსა და სკი-კროსში უმასპინძლებს, ჩემპიონატის ოფიციალური მზღვეველი კი თიბისი დაზღვევა იქნება. შეჯიბრი ბაკურიანში ჩატარდება, მასში მონაწილეობას 40-ზე მეტი ქვეყნის წარმომადგენელი მიიღებს, მათ შორის 5 ქართველი მონაწილეა.

თიბისი დაზღვევამ საქართველოს სათხილამურო ფედერაციისა (GSF) და საერთაშორისო სათხილამურო ფედერაციის (FIS) ჩართულობით შექმნა ბაკურიანი 2023-ზე მორგებული პასუხისმგებლობის დაზღვევა ყველა საერთაშორისო სტანდარტის დაცვით. 2018 წლიდან თიბისი დაზღვევა ორგანიზატორების სამოქალაქო პასუხისმგებლობას აზღვევს, რაც გულისხმობს ჩემპიონატისთვის დათმობილ ტერიტორიაზე დამსწრეთა ქონებრივი და პირადი უსაფრთხოების უზრუნველყოფას. ანაზღაურება გაიცემა ფედერაციის მიზეზით სტუმრის მატერიალური ქონების ან ჯანმრთელობის დაზიანების შემთხვევაში.

"ბაკურიანი 2023 ზამთრის მთავარი სპორტული მოვლენაა და მნიშვნელოვანი შესაძლებლობაა ჩვენი ქვეყნისათვის. მიმდინარე ჩემპიონატს წინ უძღოდა ბაკურიანსა თუ გუდაურში გამართული შეჯიბრებები და ჩვენთვის საამაყოა ის, რომ უკვე წლებია GSF-სა და FIS-ის ჩართულობით ვაზღვევთ სპორტულ ღონისძიებებს. შეჯიბრის ფარგლებში ჯამური სადაზღვევო თანხა 15 000 000 ლარზე მეტს შეადგენს", — პაატა ღაძაძე, თიბისი დაზღვევის გენერალური დირექტორი.

ბაკურიანი 2023 18 თებერვალს გაიხსნება და 6 მარტის ჩათვლით ფრისტაილის შვიდ როგორც ინდივიდუალურ, ასევე, ჯგუფურ შეჯიბრებას სამ ტრასაზე უმასპინძლებს.