ამის შესახებ ეროვნული გალერეის დირექტორი, მაცაცო გაბუნია, სოციალურ ქსელში განცხადებას ავრცელებს.

რატომ არის მნიშვნელოვანი: 4 თებერვალს, ეროვნულ გალერეაში, კულტურის ცენტრ ათინათის გამოფენის გახსნაზე, მხატვარმა სანდრო სულაბერიძემ საკუთარი ნამუშევარი ჩამოხსნა და მის ნაცვლად, კედელზე დატოვა წარწერა — "ხელოვნება ცოცხალი და დამოუკიდებელია".

• ქართული სახელოვნებო სივრცის წარმომადგენლებმა საქართველოს შსს მინისტრს, ვახტანგ გომელაურს მიმართეს და სთხოვეს სულაბერიძის მიმართ აღძრულ საქმეს კვალიფიკაცია შეცვალოს და საკითხი მხატვარსა და გალერეას შორის მოლაპარაკებით მოგვარდეს.
• გუშინ მხატვარ სანდრო სულაბერიძის მიერ კედელზე გაკეთებულ წარწერაზე ქურდობის მუხლით გამოძიება დაიწყო.
• რაც ქურდობის მუხლი სასჯელის სახით 1-დან 2 წლამდე შინაპატიმრობას ან თავისუფლების 3-დან 5 წლამდე აღკვეთას ითვალისწინებს.

რას ამბობს მაცაცო გაბუნია: მისი თქმით, საქართველოს ეროვნული გალერეა გახლავთ სახელმწიფო დაწესებულება, საიდანაც სურვილისებრ ნამუშევრის ჩამოხსნა და გატანა მარტივად არ ხდება. გალერეა ემორჩილება გარკვეულ წესებს და არის პასუხისმგებელი არა მხოლოდ დავით კაკაბაძის, ქეთევან მაღალაშვილის, სიდამონ-ერისთავისა და სხვათა ნამუშევრებზე.

• რომ აღარაფერი ვთქვათ მომიჯნავე დარბაზში ექსპონირებულ ფიროსმანზე, არამედ ყველა იმ ნამუშევარზე, რომელიც, თუნდაც დროებით, მის სივრცეში იფინება, ასევეა კერძო გალერეის შემთხვევაში.
• ამბობს, რომ ხელოვანებს და მითუმეტეს გალერისტებს არ უნდა ჭირდებოდეთ იმისი ახსნა, რომ საგამოფენო სივრცეში გამოფენილ ნამუშევარზე სწორედ სივრცის მენეჯმენტია პასუხისმგებელი, იმისგან დამოუკიდებლად, სივრცე კერძოა თუ სახელმწიფო.
• "არ შევდივარ პოლემიკაში იმის თაობაზე, რა სახელოვნებო მედიუმს ეკუთვნის სანდრო სულაბერიძის ქმედება, არ ვუკეთებ ინტერპრეტაციას მის მიერ კედელზე დატოვებულ წარწერის ხარისხს ან მართებულობას", — წერს გაბუნია.
• მისი თქმით, არ მსჯელობს იმაზე, რამდენად ფასეულია მისი ნამუშევარი, რომელიც ჩამოხსნა და გალერეიდან გაიტანა.
• წერს, რომ კანონისთვის, რომელიც სხვა შემთხვევაში ყველას უნდა, რომ მუშაობდეს, არ აქვს მნიშვნელობა, ვინ გაიტანა გალერეიდან ექსპონატი, პატრონმა თუ მისმა თაყვანისმცემელმა.
• "ფაქტია გამოფენის მსვლელობისას დაიკარგა ნამუშევარი! ამის შესახებ მე (სწორედ მე, რადგან ამას ითხოვს კანონი!) განვაცხადე პოლიციაში და ზედამხედველებთან ერთად დავიკითხე კიდეც", — წერს დირექტორი.

გარდა ამისა, ის მოტევებას ითხოვს და განმარტავს, რომ "ზოგიერთებისგან განსხვავებით, სახელმწიფოს და საზოგადოების წინაშე აღებული ვალდებულებების და პასუხისმგებლობების გამო, ქუჩური გაგებებით ვერ იხელმძღვანელებს.

• რადგან ხვალ ვინმემ ფიროსმანი რომ გაიტანოს, პირველი მას მოსთხოვენ პასუხს და მართლებიც იქნებიან.
• "სანდრო სულაბერიძის პერფორმანსის გამო, გამომიცხადეს საყვედური. უსაფრთხოების სამსახურის უფროსი, რომელსაც სხვა პოზიციაზე გადაყვანა შესთავაზეს, საკუთარი გადაწყვეტილებით წავიდა სამსახურიდან, ბოლომდე გააცნობიერა საკუთარი შეცდომა", — წერს გაბუნია.
• ამბობს, რომ უცოდველი აქტის გამო, ერთი ადამიანი უკვე დაზარალდა, რომ აღარაფერი ვთქვათ გალერეის დათრგუნულ თანამშრომლებზე.
• "მინდა ისიც გითხრათ, რომ ჩემს განცხადებაში მომხდარი ფაქტის შესახებ, მე არ ვითხოვ სანდრო სულაბერიძის დაჭერას, რადგან განაცხადების დაწერის მომენტში, ჩვენთვის უკვე ცნობილი იყო, ვინ გაიტანა ნამუშევარი", — წერს დირექტორი.
• ამბობს, რომ მას არავინ დაიჭერს, თუმცა ადმინისტრაციულ ჯარიმას აუცილებლად დაუწესებენ, რაც აბსოლუტურად გამართლებული იქნება ისევ და ისევ კანონიდან გამომდინარე.
• მისი თქმით, ჯარიმაც უკვე გადახდილია გამოფენის სპონსორის მიერ. უბრალოდ საზოგადოებამ უნდა აცალოს კანონს, გაიაროს ყველა აუცილებელი ეტაპი და ისე დასრულდეს.

მაცაცო გაბუნია ამბობს, რომ სამომავლოდ პერფორმანსები დადგან, რომ არ შევიდნენ კანონთან კონფლიქტში და თუ მანიც შევლენ, სასჯელისთვისაც მზად იყვნენ.

• "არავის ავნოთ და მხატვრის ნამუშევარზე პასუხისმგებელ ადამიანებს არ შეუქმნათ მძიმე პრობლემები იმისთვის, რომ თქვენი გზავნილი და ქმედება მართლაც იყოს მნიშვნელობის მატარებელი ხელოვნება და არა ინფანტილური მავნებლობა", — წერს გალერეის დირექტორი.