საქართველოს პენცენტრი გმობს მხატვარ სულაბერიძის წინააღმდეგ სისხლის სამართლის საქმის აღძვრას და მოთხოვნებს აჟღერებს.

რატომ არის მნიშვნელოვანი: 4 თებერვალს, ეროვნულ გალერეაში, კულტურის ცენტრ ათინათის გამოფენის გახსნაზე, მხატვარმა სანდრო სულაბერიძემ საკუთარი ნამუშევარი ჩამოხსნა და მის ნაცვლად, კედელზე დატოვა წარწერა — "ხელოვნება ცოცხალი და დამოუკიდებელია".

  • კედელზე გაკეთებული წარწერის გამო სულაბერიძის მიმართ ქურდობის მუხლით გამოძიება დაიწყო, რაც სასჯელის სახით 1-დან 2 წლამდე შინაპატიმრობას ან თავისუფლების 3-დან 5 წლამდე აღკვეთას ითვალისწინებს.
  • პენცენტრი გამოქვეყნებული განცხადების თარიღად 1937 წელს უთითებს და ბოლო დროს კულტურის სფეროში განვითარებულ მოვლენებს რეპრესიებთან აიგივებს.

დეტალები: ორგანიზაცია მომხდარს სანდრო სულაბერიძეზე რეპრესიულ თავდასხმად მიიჩნევს, რომელიც მიზნად ისახავს არა მხოლოდ კონკრეტული მხატვრის დასჯას, არამედ ქართველი ხელოვანების დაშინებას.

  • "მხატვრის წინააღმდეგ, მისი ნამუშევრის გამო სისხლის სამართლის საქმის აღძვრა, ასევე ადმინისტრაციული წარმოების დაწყება, თავისი არსით არის პუტინის რუსეთისთვის დამახასიათებელი ქმედება და ცხადყოფს, რომ კულტურის მინისტრი, თეა წულუკიანი და შინაგან საქმეთა მინისტრი, ვახტანგ გომელაური მოქმედებენ საქართველოს სახელმწიფოსთვის შეუთავსებელი ღირებულებებითა და ფასეულობებით", — ნათქვამია განცხადებაში.
  • საქართველოს პენცენტრი მიიჩნევს, რომ კულტურის მინისტრი არაკომპეტენტურია, ის აზიანებს შემოქმედებით პროცესებს და განგებ ცდილობს საქართველოს მოქცევას კულტურულ იზოლაციაში, რაც, საფრთხეს უქმნის ქვეყნის ეროვნული უსაფრთხოებას.
  • პენცენტრი მოითხოვს შეწყდეს სამართალწარმოება სანდრო სულაბერიძის მიმართ.

ამასთანავე, პენცენტრი მოითხოვს შეწყდეს სამართალწარმოება სანდრო სულაბერიძის მიმართ.

  • საქართველოს პენცენტრი მოითხოვს, "კულტურის მინისტრმა, თეა წულუკიანმა, ამ გაუგონარი პუტინისტური გამოხდომის გამო, საქართველოს კულტურული მემკვიდრეობის უმნიშვნელოვანესი ძეგლის, გელათის სამონასტრო კომპლექსის დაზიანებისგან დაუცველობის გამო, მუზეუმებიდან კომპეტენტური მეცნიერებისა და თანამშრომლების უკანონოდ, პოლიტიკური ნიშნით გათავისუფლების გამო, დაუყოვნებლივ დატოვოს დაკავებული თანამდებობა".
  • ორგანიზაცია აცხადებს, რომ სხვა ქართველ სახელოვნებო ჯგუფებთან ერთად ამ მიზნის მისაღწევად პროტესტის ყველა ფორმას გამოიყენებს.
  • ხელმომწერთა სრული სია შეგიძლიათ იხილოთ ბმულზე.