თბილისიდან გატაცებული აზერბაიჯანელი ჟურნალისტის გამოძიებებზე მუშაობას ორგანიზებული დანაშაულისა და კორუფციის გაშუქების პროექტი (OCCRP) გააგრძელებს. აფგან მუხტარლი საქართველოში, აზერბაიჯანის პრეზიდენტის ოჯახის კორუფციული ბიზნესების თემაზე მუშაობდა და ამ საკითხზე რამდენიმე ჟურნალისტური გამოძიებაც აქვს გამოქვეყნებული.

"მესიჯი ძალიან ცხადია. შეგიძლიათ ჩვენი ერთი რეპორტიორი დააპატიმროთ, მაგრამ მის ადგილს ათობით ჟურნალისტი დაიკავებს. სიმართლე მაინც გამჟღავნდება," - წერს ორგანიზაცია განცხადებაში.

OCCPR-ს მიაჩნია, რომ მუხტარლის დაკავება საერთაშორისო სამართლის შეურაცხყოფაა. ორგანიზაციის ცნობით, როდესაც 2014 წელს, OCCRP-ის პარტნიორი ჟურნალისტი, ხადიჯა ისმაილოვა დააკავეს, მისი საპატიმროში ყოფნის პერიოდში, OCCRP-მა გააგრძელა მისი სამუშაო და გამოაქვეყნა ხადიჯა პროექტი, საგამოძიებო მასალების სერიები ალიევის ოჯახის კორუფციაზე.

29 მაისს, თბილისიდან გაუჩინარდა აზერბაიჯანის ხელისუფლების მიერ დევნილი ჟურნალისტი, აფგან მუხტარლი. მოგვიანებით გაირკვა, რომ ის აზერბაიჯანშია დაპატიმრებული, 31 მაისს კი, აზერბაიჯანის სასამართლომ მას სამთვიანი წინასწარი პატიმრობა შეუფარდა. საქართველოს შინაგან საქმეთა სამინისტრო ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს. თბილისში რამდენიმე დღეა ჟურნალისტები და არასამთავრობო ორგანიზაციები მუხტარლის მხარდასაჭერ აქციებს მართავენ.