საერთაშორისო პრესის ინსტიტუტი (IPI) მოუწოდებს აზერბაიჯანის ხელისუფლებას, დაუყონებლივ გაათავისუფლოს ჟურნალისტი აფგან მუხტარლი, რომელიც თბილისიდან, 29 მაისს გაიტაცეს.

"აფგან მუხტარლის გაუჩინარება არის იმის მტკიცებულება, რომ აზერბაიჯანს აქვს სურვილი, დაადუმოს კრიტიკულად განწყობილი ჟურნალისტები, მათ შორის ისინიც, ვინც საზღვარგარეთ დევნილობაში ცხოვრობენ. აღნიშნული ფაქტი ასევე აჩენს სერიოზულ კითხვებს საქართველოს დამოკიდებულებას ადამიანის უფლებებისა და პრესის თავისუფლებისადმი იმ ფონზე, როცა ქვეყანა ცდილობს დაამყაროს უფრო მჭიდრო კავშირები ევროპასთან. საქართველოს ხელისუფლებამ ნათელი უნდა მოჰფინოს, როგორ მოხდა აღნიშნული ინციდენტი", - აცხადებს IPI-ს პრესის თავისუფლების პროგრამის დირექტორი სკოტ გრიფენი.

IPI-ის საქართველოს ეროვნული კომიტეტის ხელმძღვანელმა, ნათია კობერიძემ გააკრიტიკა საქართველოს ხელისუფლება აფგან მუხტარლის საქმეზე არაეფექტიანი რეაგირების გამო. მისი თქმით, ხელისუფლების განმარტებები ამ საქმესთან დაკავშირებით აზერბაიჯანის ხელისუფლების ვერსიის სიტყვა სიტყვით გამეორება იყო.

29 მაისს, თბილისიდან გაუჩინარდა აზერბაიჯანის ხელისუფლების მიერ დევნილი ჟურნალისტი, აფგან მუხტარლი. მოგვიანებით გაირკვა, რომ ის აზერბაიჯანშია დაპატიმრებული, 31 მაისს კი, აზერბაიჯანის სასამართლომ მას სამთვიანი წინასწარი პატიმრობა შეუფარდა. საქართველოს შინაგან საქმეთა სამინისტრო ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს. თბილისში რამდენიმე დღეა ჟურნალისტები და არასამთავრობო ორგანიზაციები მუხტარლის მხარდასაჭერ აქციებს მართავენ.