Instagram გლობალურად შეფერხებით მუშაობს: სოციალური ქსელის მომხმარებლები იუწყებიან, რომ საკუთარ პროფილზე წვდომა აღარ შეუძლიათ.

ამის ნაცვლად ეკრანზე შეტყობინება ჩნდება შინაარსით, რომ მათ პლატფორმაზე წვდომა მომდევნო 30 დღით შეეზღუდათ.

იმ მომხმარებელთა ნაწილს, რომელთაც Instagram-ზე შესვლა კვლავაც შეუძლიათ, მიმდევრები მნიშვნელოვნად აკლდებათ, რადგან საიტიდან დაბლოკილი ანგარიშები ქრება.

ვებსაიტზე DownDetector, რომელიც სერვისთა სტატუსის მონიტორინგს ემსახურება, Instagram-ზე არსებული პრობლემის შესახებ ათასობით ადამიანი ჩივის.

მეორე მხრივ, კომპანია თავიანთი ოფიციალური Instagram Communications ანგარიშიდან მომხმარებლებს ატყობინებს, რომ პრობლემის შესახებ იციან და მის აღმოფხვრაზე მუშაობენ.

"ვიცით, რომ ზოგიერთ თქვენგანს Instagram-ის ანგარიშზე წვდომასთან პრობლემები გაქვთ. საკითხს ვიძიებთ და უხერხულობისთვის ბოდიშს გიხდით", — ვკითხულობთ Twitter-ზე გავრცელებულ განცხადებაში.

Instagram-ს პრობლემის გამომწვევი მიზეზები არ დაუკონკრეტებია.