უწყების განცხადებით, ყადაღა მოსამართლის განჩინების საფუძველზე დაიდო ანტიკორუფციული სააგენტოს წარმოებაში არსებულ სისხლის სამართლის საქმეზე, რომელზეც გამოძიება უკანონო შემოსავლის ლეგალიზაციის ფაქტზე მიმდინარეობს.

რატომ არის მნიშვნელოვანი: დაკავების შემდეგ სუს-ის ყოფილმა მაღალჩინოსანმა, იოსებ გოგაშვილმა სოციალურ ქსელში არაერთი წერილი გაავრცელა — საუბრობდა ხელისუფლების ჩადენილ სავარაუდო დანაშაულებზე და ამბობდა, რომ თანამდებობაზე ყოფნის პერიოდში ბიძინა ივანიშვილისგან უკანონო დავალებებს იღებდა.

  • მისივე თქმით, ქართული ოცნება მასზე "გენერალურ შეტევას" ამზადებს და ივანიშვილისგან მუქარა მიიღო, რომ თუ არ გაჩუმდება, მას და მის ოჯახს გაანადგურებენ

დეტალები: 12 სექტემბერს გოგაშვილის შვილმა განაცხადა, რომ მას და მისი ოჯახის წევრებს ქონება დაუყადაღეს.

  • "ეს ფაქტი კიდევ ერთხელ ადასტურებს, რომ სოსო გოგაშვილის მიერ გავრცელებული ინფორმაცია შეესაბამება რეალობას რაც იწვევს კეთილი ფილანთროპის განრისხებას", — წერდა ის.

სუს-ის განცხადებით, ყადაღა დაედო, როგორც უძრავ, ასევე, მოძრავ ქონებას.

  • კერძოდ, თბილისში, კახეთის რეგიონში, ხონის მუნიციპალიტეტში, მარტყოფსა და დაბა ბაკურიანში მდებარე, ჯამში 34 მიწის ნაკვეთს, 4 საცხოვრებელ ბინას და სიღნაღში მდებარე სასტუმროს.
  • 13 ავტომანქანას, 3 სასოფლო-სამეურნეო ტექნიკას, 3 ერთეულ მოტოტექნიკას და 15 ცეცხლსასროლ იარაღს.
  • უწყება არ აკონკრეტებს რამდენი პირის საკუთრებაზეა საუბარი.