22 მაისს, ანკარაში, დაიწყო ახალი სასამართლო პროცესი, რომელზეც განიხილება 2016 წლის 15 ივლისის გადატრიალების მოწყობის მცდელობისთვის ბრალდებულთა საქმე. ჯამში, ბრალი 221 ადამიანს ედება მასობრივი მკვლელობებისა და მცდელობისთვის, ძალის გამოყენებით შეეცვალათ თურქეთის პარლამენტი და მთავრობა. ასევე, მათ ბრალად ედებათ თურქეთის პრეზიდენტის, რეჯეპ ტაიპ ერდოღანის მოკვლის მცდელობა.

ბრალდებულებს შორის არიან თურქეთის მაღალჩინიანი სამხედროები, რომელთაგან 50 გენერალია. ამბოხებულებიდან 200 ადამიანი უკვე დაჭერილია, ცხრა - სასამართლო პროცესამდე დროებით განთავისუფლებული, ხოლო 12 იძებნება.

პირველი მოსმენა, სადაც განიხილავენ თუ რა საერთო ჰქონდათ ეჭვმიტანილებს პუტჩთან, გაიმართება 22 მაისიდან 16 ივნისამდე.

მათ შორის, ვისი სასამართლო პროცესიც დაუსწრებლად ჩაივლის, სასულიერო პირი ფეთქჰულა გიულენია. ის ამჟამად ამერიკაში იმყოფება. თურქეთის მთავრობა სწორედ მას მიიჩნევს ქვეყნის გადატრიალების მცდელობის ორგანიზატორად, თავდაპირველად 47 ათასი ადამიანი მხოლოდ იმისთვის დააკავეს, რომ ფეტულა გიულენის ორგანიზაციებთან ჰქონდათ კავშირი.

2016 წელს ქვეყნის გადატრიალების მცდელობისას დაიღუპა 248 ადამიანი, ორი ათასზე მეტი კი დაშავდა. თურქეთის მთავრობის ინფორმაციით, აჯანყებულებმა შეძლეს მათ მხარეს გადაებირებინათ რვა ათასზე მეტი სამხედრო პირი.

ამბოხის ჩახშობის შემდეგ, ქვეყნის სახელმწიფო უწყებებში მასობრივი წმენდა დაიწყო, 40 ათასზე მეტი ადამიანი დააპატიმრეს, ხოლოდ 100 ათასზე მეტი სამსახურიდან დაითხოვეს.