ცეცხლის შეწყვეტისა და საომარი მოქმედებების შეჩერებისკენ მოწოდებების მიუხედავად აზერბაიჯანსა და სომხეთს შორის შეტაკებები გრძელდება — მხარეები კვლავ ერთმანეთს ადანაშაულებენ.

რატომ არის მნიშვნელოვანი: 12 სექტემბერს დილით გავრცელდა ინფორმაცია, რომ აზერბაიჯანულმა მხარემ ცეცხლი გაუხსნა მთიან ყარაბაღის ორ დასახლებას — კარმირ შუკასა და თაღავარდს.

  • აზერბაიჯანის თავდაცვის სამინისტრო კი ამტკიცებდა, რომ სომხეთის შეიარაღებული ძალები რამდენიმე დღეა აზერბაიჯანის პოზიციების მიმართულებით ისვრიან, რასაც სომხეთის უარყოფდა;
  • საღამოს კი ცნობილი გახდა, რომ აზერბაიჯანი სომხეთის 3 ქალაქს ინტენსიურად ბომბავს.

აზერბაიჯანი აცხადებს, რომ მათ სომხეთის "ფართომასშტაბიან პროვოკაციებს" უპასუხეს — ინფორმაციას OC Media ავრცელებს.

  • აზერბაიჯანის თავდაცვის სამინისტრო სომხეთის შეიარაღებულ ძალებს ცეცხლის შეწყვეტის შეთანხმების დარღვევაში ადანაშაულებს;
  • მათი მტკიცებით, სომხეთის მხარემ დღეს დილით სხვადასხვა კალიბრის ნაღმმტყორცნებიდან და საარტილერიო დანადგარებით ცეცხლი გაუხსნა კალბაჯარისა და ლაჩინის მიმართულებით განლაგებულ აზერბაიჯანულ ქვედანაყოფებს;
  • უწყების თქმით, აზერბაიჯანის ქვედანაყოფები შესაბამის საპასუხო ზომებს იღებენ.

სომხეთი კი ამბობს, რომ აზერბაიჯანულმა მხარემ ჯერმუკის მიმართულებით დრონები გამოიყენა.

  • მათი მტკიცებით, დღეს, დილის 8 საათიდან აზერბაიჯანმა სხვადასხვა ტიპის არტილერიით განაახლა თავდასხმები, კონკრეტულად ჯერმუკისა და ვერინ-შორჟას მიმართულებით;
  • თავდაცვის უწყების განცხადებით, სომხეთის შეიარაღებული ძალები ადეკვატურ საპასუხო მოქმედებებს ახორციელებენ და მათ წინაშე დასახულ საბრძოლო დავალებებს ასრულებენ;
  • სომხეთი შექმნილ ვითარებაზე სრულ პასუხისმგებლობას აზერბაიჯანს აკისრებს.