ინდოელ ადვოკატ ტუნგნატ ჩატურვერტს მატარებლით მგზავრობისას ორ ბილეთში 0.25 დოლარით მეტი გადაახდევინეს. ეს ამბავი 1999 წელს მოხდა და ინდოელმა ადვოკატმა სარკინიგზო კომპანიის წინააღმდეგ სასამართლო დავა მაშინვე წამოიწყო. 22 წლის შემდეგ კი, სასამართლომ საბოლოო გადაწყვეტილება მიიღო და ჩატურვერტი გამარჯვებულად ცნო.

"ამ საქმესთან დაკავშირებით 100-ზე მეტ პროცესს დავესწარი. აქ ფული არ არის მთავარი, ჩემთვის ეს პროცესები სამართლიანობისთვისა და კორუფციის წინააღმდეგ ბრძოლას უკავშირდებოდა", — განაცხადა ინდოელმა ადვოკატმა.

ფოტო: Twitter

სამართლებრივი დავა იმიტომ გაჭიანურდა, რომ სარკინიგზო კომპანიას საქმის პროცესებზე განხილვა არ სურდა. ამას ემატებოდა მოსამართლისა და საქმეში ჩართული სხვა ადამიანების შვებულებები, რის გამოც პროცესები ბევრჯერ გადაიდო. როგორც თავად ჩატურვერტი იხსენებს, ოჯახმა დანებება რამდენჯერმე სთხოვა, რადგან წლების შემდეგ დავის მოგების იმედი არ ჰქონდათ. თუმცა ინდოელმა ადვოკატმა 22 წელი იბრძოლა და ბოლოს სასამართლომ სწორედ ის გაამართლა.

სასამართლოს გადაწყვეტილებით, სარკინიგზო კომპანია ინდოელ კაცს $188-ს გადაუხდის. ჩატურვერტის თქმით, იმედი აქვს, რომ მისი შემთხვევა სხვებისთვის მოტივაცია გახდება, რათა არ დანებდნენ მაშინაც კი, როცა "ბრძოლა საკმაოდ რთული ჩანს".