საქართველოს მართლმადიდებელი ეკლესიის პატრიარქმა საპატრიარქოს მიერ სპეციალურად გამოცემულ ჟურნალში ბედნიერი ოჯახი წერილი გამოაქვეყნა, სადაც ის საუბრობს, თუ როგორი უნდა იყოს ქრისტიანული ოჯახი. პატრიარქი ქრისტიან ცოლ-ქმარს რჩევებს აძლევს, რაც უკავშირდება როგორც ერთმანეთთან მოპყრობის, ისე ოჯახში ქცევის წესებს.

იმისათვის, რომ ოჯახმა ბედნიერება შეინარჩუნოს, ილია მეორის აზრით, წყვილმა ერთმანეთის ცხოვრება უნდა ისწავლოს და თავიანთი გარემო "მცირე ეკლესიად აქციონ":

"რას ნიშნავს ეს?

ოჯახში იერარქია (უფროს-უმცროსობა) დაცული უნდა იყოს და მისი თავი უნდა იყოს ქმარი, როგორც ამას უფალი ბრძანებს. ეს იმას არ ნიშნავს, რომ იგი რაიმეთია უპირატესი, არამედ მას მეტი პასუხისმგებლობა აქვს და ევალება მზრუნველობა და დაცვა ოჯახისა. ზრუნვა კი გულისხმობს არა მარტო მატერიალურ უზრუნველყოფას, არამედ ღვთის წინაშე მეოხებასაც".

ილია მეორე მოუწოდებს მეუღლეებს, ისწავლონ ერთმანეთისთვის პატივის მიგება და ერთმანეთისთვის ცხოვრება. პატრიარქი მორწმუნეებს ასევე აძლევს რჩევებს ბავშვების აღზრდასთან დაკავშირებით და ურჩევს, რომ ასწავლონ სხვების დახმარება, იზრუნონ მათ განათლებაზე და "ატარონ წრეებზე", მათ შორის ქართული სიმღერა-გალობისა და ცეკვის.

ილია მეორე ასევე ხაზს უსვამს სიყვარულისა და მიტევების უნარის მნიშვნელობაზე.

ჟურნალი "ბედნიერი ოჯახი" დღეს, 17 მაისს, ოჯახის სიმტკიცის დღესთან დაკავშირებით სამებაში მისულ მოქალაქეებს დაურიგეს.