გირჩი — მეტი თავისუფლების ლიდერი, სამოქმედო გეგმაზე ვიდეომიმართვაში ისაუბრა.

რატომ არის მნიშვნელოვანი: ჯაფარიძე ამბობს, რომ ის და თავისი მეგობრები სექტემბრიდან ასეთი მეთოდებით ბრძოლას აპირებენ მანამ, სანამ რიგგარეშე არჩევნები არ ჩაინიშნება.

დეტალები: ჯაფარიძემ ვიდეოში ქვეყანაში არსებული ვითარება მიმოიხილა და სისტემის დამარცხებისა და მმართველობის ამ ფორმის შეცვლის აუცილებლობაზე ისაუბრა.

  • მისი თქმით, ამის გარეშე ევროინტეგრაციის გზაზე არსებული ფანჯარა, რომელიც უკრაინელებმა საკუთარი სიცოცხლის დათმობით გააღეს, შეიძლება ძალიან სწრაფად დაიხუროს.
  • "გამოსავალი არის ის, რომ მივაღწიოთ არჩევნებს, რაც შეძლება სწრაფად, რადაც არ უნდა დაგვიჯდეს და რა სისტემითაც არ უნდა მოგვიწიოს მისი ჩატარება".

ამასთან, ჯაფარიძის სიტყვებით, სიმდიდრისგან და პატივმოყვარეობისგან გაგიჟებული ხალხი, ძალაუფლებას საკუთარი ნებით არ დათმობს.

  • ამბობს, რომ "ოპოზიციურად წოდებული" პარტიების დიდი ნაწილი სისტემის ნაწილადაა ქცეული და ძალაუფლების შენარჩუნებით თავადაც ასევე არიან დაინტერესებული.

ჯაფარიძის თქმით, გამოსავალი არა მხოლოდ ივანიშვილის, არამედ სისტემის დამარცხებაშია, რომლის სათავეშიც ივანიშვილი დგას და დასძენს, რომ სისტემის შეცვლის გარეშე, ევროპიდან არანაირ სტატუსზე არ იქნება საუბარი.

  • "სისტემის ნაწილია ქართული ოცნება, ხელოვნურად გაბერილი ბიუროკრატია, ივანიშვილთან და რუსეთთან ალიანსში მყოფი საპატრიარქო, ქურდული სამყარო, ნაყიდი კულტურისა და სპორტის ე.წ. მოღვაწეები, ნაყიდი სკოლებისა და ბაღების თანამშრომლები, პოლიცია, სასამართლო, და ამათი ყველას მართვის ცენტრი სუს — ამ სისტემას კიდევ ზურგს უმართლებს რუსეთი".
  • "ივანიშვილი, ანუ ოლიგარქი ამ სისტემას თვითონ არ შეცვლის და არ დაასრულებს მმართველობის ამ ფორმას, მას ძალაუფლება შეიძლება მხოლოდ ძალით წაართვა".

ჯაფარიძე გამოსავლის გზად არშეგუებას, დაუმორჩილებლობას, პროტესტსა და საბოტაჟს ასახელებს.

  • "ეს ის არის, რასაც ჩვენგან ელოდება, მათ შორის, დასავლეთიც, რაც არ უნდა ილაპარაკონ ევროპელმა და ამერიკელმა პოლიტიკოსებმა და დიპლომატებმა, ისინი ჩვენგან თავისუფლებისთვის ბრძოლას ელოდებიან".
  • "გთავაზობთ ყველას ამაში მონაწილეობას, არ მაინტერესებს რომელი პარტიის მხარდამჭერი ხარ, არც ის მაინტერესებს, ვის დაუჭერთ მხარს მომავალში".
  • "მაინტერესებს მხოლოდ სამი რამ — გააზრებული გაქვს თუ არა, რომ თავზე ძალაუფლების უზურპატორი რუსების მონები გაზიან, გააზრებული გაქვს თუ არა, რომ არჩევანის უფლებას მხოლოდ ქუჩაში ბრძოლით დაიბრუნებ და მზად ხარ თუ არა, ასეთი ბრძოლისთვის".

მათ, ვისაც სურთ, სამოქმედო გეგმას შეუერთდნენ, შეუძლიათ, ბმული შეავსონ, რომელიც ჯაფარიძის ვიდეოს ახლავს თავს.