ნეტფლიქსზე მალე საშინელებათა ჟანრის ახალ სერიალს ვიხილავთ. ტაილანდურენოვანი პროექტი School Tales ("სკოლის ამბები"), რომელიც კომიქსებს ეფუძნება, მისტიკისა და ჰორორის ნაზავია.

დღისით სკოლა მოსწავლეებს ეკუთვნით, ღამით კი აქ სულ სხვა ამბავი ხდება.

"მოჩვენებები ბიბლიოთეკაში, ადამიანის ხორცი სასადილოში, უთავო სული სკოლის სარდაფში და საკლასო ოთახი, სადაც მხოლოდ მკვდარი მოსწავლეები სწავლობენ. მოემზადეთ ახალი სახის შიშის განსაცდელად", — ასეთი აღწერით წარადგინა ნეტფლიქსმა სერიალის ტრეილერი, რომელიც ნამდვილად შემაძრწუნებელ თავგადასავალს გვპირდება.

გაფრთხილება: ტრეილერის ვიდეო შეიცავს კადრებს, რომელთა ნახვაც ზოგიერთი მაყურებლისთვის მიზანშეუწონელი შეიძლება იყოს.

კომიქსების პოპულარული სერიის ეკრანიზაციაზე ექვსმა ტაილანდელმა რეჟისორმა იმუშავა.

სკოლის ამბები რვა სერიაში რვა დამოუკიდებელ ისტორიას გააერთიანებს. ყველა მათგანი ერთდროულად გამოვა 10 აგვისტოს.

აღსანიშნავია, რომ ნეტფლიქსზე საშინელებათა ჟანრის სერიალები დიდი პოპულარობით სარგებლობს. Stranger Things-ის წარმატებაზე რომ არაფერი ვთქვათ, წლების წინ მაყურებელთა დიდი მოწონება დაიმსახურა Chilling Adventures of Sabrina-მაც. სავარაუდოდ, შემოდგომაზე გამოვა ამავე ჟანრის კიდევ ერთი სერიალი 1899, რომელზეც Dark-ის შემქმნელებმა იმუშავეს.