ალბათ, გახსოვთ, რომ რამდენიმე კვირის წინ, გავრცელდა ინფორმაცია, რომ HBO სერიალი Game of Thrones-ის რამდენიმე სპინოფზე მუშაობს. პირველადი ინფორმაციით, კომპანია ოთხი სერიალის გადაღებას აპირებდა, თუმცა, როგორც მწერალი ჯორჯ მარტინი ამბობს, ამჟამად მუშაობა ხუთ პილოტზე მიდის.

"არ ვიცი ამ ხუთი პილოტიდან რამდენს გადაიღებენ და სერიალად რამდენი მათგანი იქცევა", ამბობს ის.

მარტინის თქმით, ახალი სერიალები ამჟამინდელი ამბისა პრიქველები იქნება. ანუ მოვლენები ამჟამინდელი პერიოდის წარსულში განვითარდება. მან ასევე თქვა, რომ რობერტის აჯანყება და დანკი და ეგი ამ ხუთ სპინოფს შორის არ იქნება:

"რობერტის აჯანყების შესახებ ყველა დეტალს გაიგებთ, როცა წიგნების წერას მოვრჩები. შესაბამისად, სერიალი ამ თემაზე რო გადავიღოთ, ახალი აღარაფერი იქნება, მხოლოდ ბრძოლებისა და უკვე ნაცნობი დეტალების ეკრანზე გაცოცხლებას ვნახავთ, რაც საინტერესო არ იქნება. რაც შეეხება დანკს და ეგს, ოდესმე კარგი იქნება, მაგრამ ჯერ არა, ამ თემაზე კიდევ ბევრი მაქვს საწერი."

დანკი და ეგი (Dunk and Egg) ნოველების სერიაა, რომელსაც ჯორჯ მარტინი წერს. სიუჟეტი ყინულისა და ცეცხლის სიმღერის (A Song of Ice and Fire) სამყაროში ვითარდება და მოგვითხრობს, ლეგენდრული რაინდის დანკან მაღალისა და მისი სკვაირის ეგის შესახებ, რომელიც ბოლოს ვესტეროსის მეფე აეგონ V გახდა.

როგორც მარტინი ამბობს, ახალ სერიალებში მოთხრობილი იქნება ვესტეროსში ან სხვა შორეულ მხარეებში განვითარებული მოვლენები.